ໃນວັນທີ 01 – 09 ຕຸລາ 2023 ຜ່ານມາ, ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ເດີນທາງໄປທັດສະນະສຶກສາ ແລະ ແລກປ່ຽນບົດຮຽນກ່ຽວກັບວຽກງານຊັບສິນທາງປັນຍາ, ທີ່ປະເທດ ການາດາ, ນໍາພາຄະນະໂດຍ ທ່ານ ສັນຕິສຸກ ພູນສະຫວັດ, ຫົວໜ້າກົມຊັບສິນທາງປັນຍາ, ພ້ອມດ້ວຍຄະນະພະແນກ ຈໍານວນ 5 ທ່ານ, ການໄປທັດສະນະສຶກສາໃນຄັ້ງນີ້ ໂດຍໃຫ້ການສະໜັບສະໜູນຈາກໂຄງການອໍານວຍຄວາມສະດວກທາງດ້ານການຄ້າ ແລະ ການລົງທຶນຂອງປະເທດການາດາ (CTIF) ຊຶ່ງເປັນໂຄງການຊ່ວຍເຫຼືອ ກົມຊັບສິນທາງປັນຍາ ພາຍໃຕ້ຫົວຂໍ້ “ການສ້າງຄວາມເຂັ້ມແຂງວຽກງານການບັງຄັບໃຊ້ຊັບສິນທາງປັນຍາ ພາຍໃຕ້ສັນຍາການຄ້າທີ່ຕິດພັນກັບສິດຊັບສິນທາງປັນຍາຂອງອົງການການຄ້າໂລກ” ໄລຍະປີ 2021-2022.
ການໄປທັດສະນະສຶກສາໃນຄັ້ງນີ້ ຄະນະດັ່ງກ່າວ ກໍໄດ້ເຂົ້າຢ້ຽມຢາມ ແລະ ເຮັດວຽກ ກັບບັນດາສໍານັກງານຕ່າງໆ ເພື່ອແລກປ່ຽນບົດຮຽນ ເຊັ່ນ: ຢ້ຽມຢາມສຳນັກງານຊັບສິນທາງປັນຍາແຫ່ງການາດາ; ສຳນັກງານມໍລະດົກ; ຄະນະກຳມະການວຽກງານລິຂະສິດ; ສຳນັກງານນະວັດຕະກຳ, ວິທະຍາສາດ ແລະ ເສດຖະກິດ; ແລະ ສຳນັກງານຮ່ວມມືສາກົນແຫ່ງການາດາ. ຊຶ່ງການຢ້ຽມຢາມ ແລະ ເຮັດວຽກ ໃນຄັ້ງນີ້, ຄະນະດັ່ງກ່າວ ກໍໄດ້ຖອດຖອນບາງບົດຮຽນສຳຄັນ ເຊັ່ນ: ການສົ່ງເສີມວຽກງານຊັບສິນທາງປັນຍາຂອງປະເທດ ການາດາ ໂດຍສະເພາະ ການສ້າງຕັ້ງສູນສົ່ງເສີມນະວັດຕະກຳ ແລະ ການຄົ້ນຄວ້າ ໃນແຕ່ລະທ້ອງຖິ່ນ, ລວມທັງ ການສົ່ງເສີມການນໍາໃຊ້ຄວາມຮູ້ພື້ນບ້ານອັນເປັນມູນເຊື້ອຂອງຄົນທ້ອງຖິ່ນ ເພື່ອພັດທະນາ ແລະ ສົ່ງເສີມການຜະລິດ, ຊຶ່ງການສ້າງຕັ້ງ ແລະ ເຄື່ອນໄຫວຂອງສູນດັ່ງກ່າວ ແມ່ນນໍາໃຊ້ງົບຂອງລັດຖະບານ.
ການຈັດຕັ້ງປະຕິບັດໜ້າທີ່ວຽກງານ ໃນສຳນັກງານຕ່າງໆ ທີ່ປະເທດການາດາ ສ່ວນຫຼາຍແມ່ນ ສາມາດເລືອກມື້ມາປະຈໍາການຢູ່ຫ້ອງການໄດ້ ແລະ ສາມາດເຮັດວຽກຢູ່ເຮືອນໄດ້ ໂດຍສະເພາະ ສຳນັກ ງານຊັບສິນທາງປັນຍາຂອງ ປະເທດການາດາ ຊຶ່ງມີນະໂຍບາຍໃຫ້ນັກກວດສອບ ສາມາດເຮັດວຽກ ແລະ ເຂົ້າລະບົບກວດສອບຢູ່ເຮືອນໄດ້; ສໍາລັບອົງການລິຂະສິດລວມໝູ່ຂອງປະເທດການາດາ ແມ່ນໜ່ວຍງານຮັບຜິດຊອບການອະນຸຍາດນໍາໃຊ້ຜົນງານທີ່ບໍ່ມີເຈົ້າຂອງ (Orphan works) ແລະ ກໍານົດຄ່າທໍານຽມ ອະນຸຍາດນໍາໃຊ້ລິຂະສິດຂອງຜູ້ຊົມໃຊ້ ຊຶ່ງພາກສ່ວນທີ່ຕ້ອງການນໍາໃຊ້ສາມາດປະກອບແບບ ຟອມສະເໜີ ເຖິງອົງການລິຂະສິດລວມໝູ່ໄດ້; ສໍາລັບສຳນັກງານມໍລະດົກທີ່ປະເທດການາດາ ເປັນພາກສ່ວນທີ່ອອກກົດໝາຍວ່າດ້ວຍລິຂະສິດ ໃນກົດໝາຍດັ່ງກ່າວ ກວມເອົາມາດຕະການກ່ຽວກັບການລະເມີດລິຂະສິດໃນອອນລາຍ, ຊຶ່ງໄດ້ກຳນົດຄວາມຮັບຜິດຊອບຕໍ່ການລະເມີດ (liability of infringement) ໂດຍມີພາກສ່ວນທີ່ກ່ຽວຂ້ອງເຊັ່ນ ຜູ້ສະໜອງບໍລິການອິນເຕີເນັດ, ເຈົ້າຂອງເວັບໄຊ້ ຫຼື ພາກສ່ວນຕ່າງໆທີ່ກ່ຽວຂ້ອງ, ໃນປະເທດການາດາ ແມ່ນໄດ້ກຳນົດໄວ້ໃນກົດໝາຍຢ່າງລະອຽດຕໍ່ພັນ ທະຮັບຜິດຊອບດັ່ງກ່າວ ໃນການລະເມີດລິຂະສິດ.
ພ້ອມນັ້ນ, ໃນການທັດສະນະສືກສາໃນຄັ້ງນີ້ ທັງສອງຜ່າຍກໍໄດ້ປືກສາຫາລື ກ່ຽວກັບຄວາມເປັນໄປໄດ້ໃນການສ້າງບົດບັນທຶກການຮ່ວມມືສອງຝ່າຍ MOU ລະຫວ່າງ ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ແລະ ສຳນັກງານຊັບສິນທາງປັນຍາ ແຫ່ງປະເທດການາດາ, ໂດຍສະເພາະ ການແລກປ່ຽນບົດຮຽນ ກ່ຽວກັບການສົ່ງເສີມວຽກງານຊັບສິນທາງປັນຍາ ໃນຂອບເຂດທົ່ວປະເທດ ແລະ ການສ້າງຕັ້ງອົງການລິຂະສິດລວມໝູ່ ລວມເຖິງການກຳນົດຄ່າຕອບແທນໃຫ້ເຈົ້າຂອງຜົນງານລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ສະເໜີສ້າງໂຄງການສືບຕໍ່ ກ່ຽວກັບວຽກງານຊັບສິນທາງປັນຍາ ໂດຍມີຈຸດສຸມໃນບັນຫາ ເຊັ່ນ: ຄວາມລັບທາງການຄ້າ, ການສ້າງຄວາມເຂັ້ມແຂງ ໃຫ້ແກ່ ພາກທຸລະກິດ ກ່ຽວກັບການອອກແບບອຸດສາຫະກຳ, ການສ້າງຄວາມເຂັ້ມແຂງ ໃຫ້ແກ່ການບັງຄັບໃຊ້ກົດໝາຍຊັບສິນທາງປັນຍາ, ລວມທັງ ການສ້າງກົນໄກການແກ້ໄຂຂໍ້ຂັດແຍ້ງທາງດ້ານບໍລິຫານ ແລະ ອື່ນໆ.
ຂ່າວ ແລະ ຮູບພາບ: ກົມຊັບສິນທາງປັນຍາ
