ວັນທີ 28 ກຸມພາ 2019 ທີ່ຜ່ານມາ, ກົມຊັບສິນ ທາງປັນຍາ, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມສຳມະນາກ່ຽວກັບ ອານຸສັນຍາ ມາດຣິດ ເສັ້ນທາງສູ່ການເປັນຍີ່ຫໍ້ທີ່ມີຊື່ສຽງໃນລະດັບໂລກ ຢູ່ທີໂຮງ ແຮມ ຄຣາວພລາຊາ, ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ປອ. ນາງ ຂັນລາສີ ແກ້ວບຸນພັນ, ຫົວໜ້າ ກົມຊັບສິນທາງປັນຍາ; ທ່ານ ນາງ Baiba ZARINA, ເລຂາເອກຜູ້ຮັບຜິດຊອບດ້ານການເມືອງຂອງ ອົງການ ຊັບສິນທາງປັນຍາໂລກ ຊຶ່ງມີບັນດາທ່ານຜູ້ຕາງໜ້າສຳນັກງານຊັບສິນທາງປັນຍາແຫ່ງ ສະຫະພາບ ເອີຣົບ, ນັກ ວິ ທະຍາກອນຜູ້ຊົງຄຸນວຸດທິຈາກຕ່າງປະເທດ, ນັກສຳມະນາກອນຈາກທັງພາກລັດ ແລະ ເອກະຊົນ ເຂົ້າ ຮ່ວມ 80 ກວ່າທ່ານ.
ຈຸດປະສົງຂອງກອງປະຊຸມສຳມະນາດັ່ງກ່າວ ກໍແມ່ນເພື່ອເຜີຍແຜ່ຂໍ້ມູນຂ່າວສານ ແລະ ສົ່ງເສີມກ່ຽວກັ ບ ການນຳໃຊ້ລະບົບ ມາດຣິດ ເພື່ອຈົດທະບຽນສາກົນກ່ຽວກັບເຄື່ອງໝາຍການຄ້າ ໃຫ້ພາກທຸລະກິດຢູ່ໃນ ສປປ ລາວ ໂດຍສະເພາະ ແມ່ນພາກສ່ວນທີ່ເປັນທຸລະກິດສົ່ງອອກຕ່າງປະເທດ, ທັງເປັນການສ້າງຄວາມຮັບຮູ້, ຄວາມ ເຂົ້າໃຈ ແລະ ຄວາມອາດສາມາດແກ່ພາກທຸລະກິດ ແລະ ພາກສ່ວນທີ່ກ່ຽວຂ້ອງ ໃນການນໍາໃຊ້ລະບົບ ມາດຣິດ, ເພື່ອເຮັດໃຫ້ວຽກງານດັ່ງກ່າວນີ້ ສາມາດພັດທະນາ ໃນຕໍ່ໜ້າ ແລະ ອໍານວຍຄວາມສະດວກແກ່ຜູ້ປະກອບການສາມາດເຂົ້າເຖິງໄດ້ງ່າຍຂຶ້ນ.
ໂອກາດດັ່ງກ່າວ, ທ່ານ ປອ. ນາງ ຂັນລາສີ ແກ້ວບຸນພັນ ກ່າວວ່າ: ດັ່ງທີ່ພວກເຮົາຮູ້ນຳກັນແລ້ວວ່າ ໃນໂລກແຫ່ງການແຂ່ງຂັນດ້ານທຸລກິດ ແລະ ຕະຫຼາດການ ຄ້າເສລີນັ້ນ, ຊັບສິນທາງປັນຍາ ແມ່ນນັບມື້ນັບມີຄວາມສຳຄັນໃນຍຸກເສດຖະກິດປັດຈຸບັນ, ການພັດທະນາ ແລະ ຂະຫຍາຍຕົວທາງດ້ານເຕັກໂນໂລຊີ ແລະ ລະບົບໂທລະ ຄົມສື່ ສານຢ່າງວ່ອງໄວ ໄດ້ກະຕຸກຊຸກຍູ້ໃຫ້ເສດຖະກິດໂລກ ໃນຍຸກສະໄໝໃໝ່ຈະເລີນເຕີບໃຫຍ່ຂຶ້ນ, ປັດຈຸບັນ ຈຳນວນຄໍາຮ້ອງຂໍຈົດທະບຽນເຄື່ອງໝາຍການຄ້າ ທີ່ໄດ້ ຍື່ນນໍາກົມ ຊັບສິນທາງປັນຍາມີຫຼາຍກວ່າ 46,000 ເຄື່ອງໝາຍ.
ອີກດ້ານໜຶ່ງ ໃນໄລຍະ 3 ປີຜ່ານມາ ນັບແຕ່ ສປປ ລາວໄດ້ເຂົ້າເປັນພາຄີຂອງອານຸສັນຍາມາດຣິດ ວ່າດ້ວຍການຈົດທະບຽນສາກົນກ່ຽວກັບເຄື່ອງໝາຍ ໃນວັນທີ 7 ທັນວາ 2015 ເປັນຕົ້ນມາ, ກົມຊັບສິນທາງປັນຍາ ໄດ້ຍື່ນຄຳຮ້ອງຜ່ານລະບົບ ມາດຣິດ ໄດ້ 3,813 ສະບັບ, ສໍາລັບຄໍາຮ້ອງຈາກ ສປປ ລາວ ມີພຽງ 3 ຄຳຮ້ອງເທົ່ານັ້ນ ຊຶ່ງ ກໍເປັນເຫດຜົນໜຶ່ງທີ່ເຮັດໃຫ້ເຂົ້າໃຈວ່າ ຄວາມຮັບຮູ້ເຂົ້າໃຈຕໍ່ກັບລະບົບ ມາດຣິດ ຂອງເຈົ້າຂອງເຄື່ອງໝາຍຍັງບໍ່ທັນທົ່ວເຖິງ.
ສະນັ້ນ, ເພື່ອເຮັດໃຫ້ວຽກທີ່ໄດ້ກ່າວມານີ້ ໃຫ້ມີການພັດທະນາໃນຕໍ່ໜ້າ ແລະ ອຳນວຍຄວາມສະດວກ ແກ່ຜູ້ປະກອບການ ສາມາດເຂົ້າເຖິງໄດ້ງ່າຍຂຶ້ນໄດ້ນັ້ນ ແມ່ນມີຄວາມຈຳເປັນຕ້ອງສ້າງຄວາມເຂົ້າໃຈຕໍ່ລະບົບມາດຣິດ ມານຳໃຊ້ໃຫ້ຫຼາຍຍິ່ງຂຶ້ນ ຊຶ່ງຈະເປັນຜົນດີຢ່າງຍິ່ງຕໍ່ກັບຄວາມເຂົ້າໃຈ ໃນການປົກປ້ອງເຄື່ອງໝາຍການຄ້າໃຫ້ ກາຍເປັນຍີ່ຫໍ້ດັງທີ່ມີຊື່ສຽງລະດັບໂລກໄດ້
