Call:

Header 1

ກົມຊັບສິນທາງປັນຍາ

ກະຊວງວິທະຍາສາດ ແລະ ເຕັກໂນໂລຊີ

Header 1

ຊົມເຊີຍ ວັນຊັບສິນທາງປັນຍາໂລກ 2020

ຊົມເຊີຍ ວັນຊັບສິນທາງປັນຍາໂລກ 2020

ເນື່ອງໃນວັນຊັບສິນທາງປັນຍາໂລກ 2020

ທຸກໆວັນທີ 26 ເມສາ ຂອງທຸກໆປີ ແມ່ນວັນສະເຫຼີມສະຫຼອງ ວັນຊັບສິນທາງປັນຍາໂລກ ບັນດາປະເທດສະມາຊິກຂອງອົງການຊັບສິນທາງປັນຍາໂລກ (WIPO) ໄດ້ພ້ອມກັນສະເຫຼີມສະຫຼອງວັນສໍາຄັນ ດັ່ງກ່າວນີ້ໃນທຸກໆປີ ຊຶ່ງ ສປປ ລາວເຮົາ ກໍຄືກະຊວງວິທະຍາສາດ ແລະ ເຕັກໂນໂລຊີ ໄດ້ຮ່ວມກັບພະແນກວິທະຍາສາດ ແລະ ເຕັກໂນໂລຊີແຂວງ ສະເຫຼີມສະຫຼອງວັນດັ່ງກ່າວໃນຂອບເຂດທົ່ວປະເທດ, ຊຶ່ງປີ 2020 ນີ້ແມ່ນຄົບຮອບ 20 ປີພໍດີຂອງການສະເຫຼີມສະຫຼອງວັນຊັບສິນທາງປັນຍາໂລກ ພາຍໃຕ້ຄໍາຂວັນວ່າ “ສ້າງນະວັດຕະກຳ ເພື່ອອະນາຄົດສີຂຽວ INNOVATE FOR A GREEN FUTURE”,  ແລະ ຜູ້ ອຳນວຍການໃຫຍ່ອົງການຊັບສິນທາງປັນຍາໂລກໄດ້ກ່າວສູນທອນພົດໄວ້ວ່າ :

ທຸກໆວັນທີ 26 ເມສາ, ພວກເຮົາຈະສະເຫຼີມ​ສະ​ຫຼອງວັນຊັບສິນທາງປັນຍາໂລກ ເພື່ອເປັນການເຜີຍ​ແຜ່ໃຫ້ເຫັນເຖິງບົດບາດຂອງສິດຊັບສິນທາງປັນຍາຕໍ່ການສົ່ງເສີມນະວັດຕະກຳ ແລະ ຫົວຄິດປະດິດສ້າງ.

ຄຳຂວັນຂອງວັນຊັບສິນທາງປັນຍາໂລກໃນປີ 2020 ນີ້ແມ່ນການນໍາເອົາ ນະວັດຕະກຳ ແລະ ສິດຂອງຊັບສິນທາງປັນຍາ ໃຫ້ກາຍເປັນໝາກຫົວໃຈໃນການຊຸກຍູ້ຄວາມພະຍາຍາມໃນການສ້າງອະນາຄົດສີຂຽວ. ເນື່ອງຈາກວ່າການຕັດສິນໃຈຂອງພວກເຮົາໃນມື້ນີ້ຈະເປັນການກຳນົດອະນາຄົດຂອງພວກເຮົາ. ໂລກເປັນບ້ານທີ່ພວກເຮົາອາໃສຢູ່, ສະນັ້ນ, ພວກເຮົາຕ້ອງຊ່ວຍກັນເບິ່ງແຍງ ແລະ ຮັກສາໂລກໜ່ວຍນີ້.

ຄໍາ​ຂວັນ​ຂອງ​ວັນ​ຊັບ​ສິນ​ທາ​ງປັນຍາ​ໂລກ​ໃນ​ປີ​ນີ້​ຍັງ ​ເປັນການສັນລະເສີນໃຫ້ແກ່ຜູ້ສ້າງນະວັດຕະກຳ ແລະ ຜູ້ສ້າງສັນຜົນງານ ທີ່ດີເດັ່ນ ໃນທົ່ວໂລກໃນການຮ່ວມກັນສ້າງອະນາຄົດສີຂຽວ. ທຸກຄົນໃນສັງຄົມ ທັງເພດຍິງ, ເພດຊາຍ ແລະ ໄວໜຸ່ມ ທີ່ກຳລັງຊອກຫາທາງເລືອກທີ່ດີ ແລະ ສະອາດ ກວ່າການນຳໃຊ້ ເຕັກໂນໂລຊີເຊື້ອໄຟຟອດຊີວແບບດັ່ງເດີມ ແລະ ອາຫານທີ່ຍືນຍົງ ແລະ ລະບົບການຄຸ້ມຄອງຊັບພະຍາກອນທຳມະ ຊາດ ແລະ ຜູ້ທີ່ນຳໃຊ້ລະບົບຊັບສິນທາງປັນຍາເຂົ້າໃນການຜະລິດຂອງຕົນ, ເພື່ອນໍາເອົາ ແລະ ນໍາໃຊ້ເຂົ້າໃນສັງຄົມ.

ພວກ​ເຮົາ​ ກໍາລັງຊອກຫາວິທີເຮັດໃຫ້ລະບົບ​ຊັບ​ສິນ​ທາງ​ປັນຍາ ມີ​ຄວາມ​ສົມ​ດຸນ ​ແລະ ​ເຂັ້ມ​ແຂງ ເພື່ອສົ່ງ​ເສີມ​ການຂະຫຍາຍຕົວ​ຂອງ ​​ເສດຖະກິດ​ສີຂຽວ ທີ່​ຮັກສາ ແລະ ບໍ່ທຳລາຍ​ລະບົບຊັບພະຍາກອນ​ທໍາ​ມະ​ຊາດ​ຂອງ​ໂລກ.

ພວກ​ເຮົາ ​ຊອກ​ຫາວິທີ​ການ​ນໍາ​ໃຊ້​ ລະບົບ​ສິດທິ​ບັດ ​ເພື່ອ​ສົ່ງ​ເສີມ​ການ​ປ່ຽນ​ແປງ​ໃໝ່​ໃນ​ການ​ພັດທະນາ ​ແລະ ການ​ເຜີຍ​ແຜ່​ເຕັກ​ໂນ​ໂລ​ຊີ ທີ່​ເປັນ​ມິດ​ກັບ​ສິ່ງ​ແວດ​ລ້ອມ ​ເພື່ອ​​ເຂົ້າ​ຊ່ວຍ​ໃນ​ການ​ແກ້​ໄຂ​ວິ​ກິດ​ການ​ປ່ຽນແປງຂອງດິນ​ຟ້າ​ອາກາດ ​ແລະ ສ້າງ​ອະນາ​ຄົດ​ສີຂຽວ.

ການ​ຄິດຄົ້ນ​ໃນ​ການອອກ​ແບບ ແລະ ສິດໃນການປົກປ້ອງແບບ ​ລວມເຂົ້າກັນ ​ເພື່ອ​ເປັນ​ການສົ່ງ​ເສີມການ​ນໍາ​ໃຊ້​ຊັບພະຍາກອນທໍາ​ມະ​ຊາດ​ຢ່າງ​ຄຸ້ມ​ຄ່າ ​ແລະ ຊ່ວຍ​ໃຫ້​ນັກ​ອອກແບບ ສາ​ມາດ​ນໍາ​ໃຊ້​ເວລາ ​ແລະ ຄວາ​ມສາມາດ​ຂອງ​ເຂົາ​ເຈົ້າ​ເຂົ້າ​ໃນ​ການ​ສ້າງ ຜະລິດ​ຕະພັນ​ທີ່​ເປັນ​ປະ​ໂຫຍ​ດ, ໜ້າສົນ​​ໃຈ ​ແລະ ​ເປັນ​ມິດ​ກັບ​ສິ່ງ​ແວດ​ລ້​ອມ ​ໃຫ້​ແກ່​ຜູ້​ບໍລິ​ໂພ​ກ.

ພວກ​ເຮົາ​ພິຈາລະນາ​ຊອກຫາວິທີ​ການ​ນໍາ​ໃຊ້​ ເຄື່ອງໝາຍການ​ຄ້າ ​ແລະ ການບົ່ງຊີ້ຕ່າງໆ ເພື່ອ​ຊ່ວຍຊຸກຍູ້​ການຂະຫຍາຍຕົວ ແລະ ຈະເລີນເຕີບໂຕຂອງ​ທຸລະ​ກິດ​ ທີ່ມີ​ພື້ນຖານໃນການຮັກສາ ​ສິ່ງ​ແວດລ້ອມ, ​ເພື່ອສົ່ງເສີມພວກເຂົາໃຫ້​ສາມາດ​ຜະລິດ​ສິນຄ້າ ​ແລະ ການ​ບໍລິການ​ທີ່​ເປັນ​ມິດ​ກັບ​ສິ່ງ​ແວດ​ລ້ອ​ມ​ໃຫ້​ຫຼາຍຂື້ນ.

ພວກ​ເຮົາ​ເຫັນ​ວ່າ​ສິດທິ​ຕ່າງໆ ​ເຊັ່ນ: ການພັດທະນາສິນຄ້າ​ຖິ່ນ​ກຳ​ເນິດ ​ເປັນ​ການ​ຊຸກຍູ້​ສົ່ງ​ເສີມ​ການ​ນໍາ​ໃຊ້​ຊັບພະຍາກອນ​ທຳ​ມະ​ຊາດ​ແບບ​ຍືນ​ຍົງ ​ແລະ ສິດຂອງນັກ​ປັບປຸງ​ພັນ​ພືດໃໝ່ ​ຊ່ວຍເປັນ​ກຳລັງແຮງທີ່​ສໍາຄັນ​ໃນ​ການ​ສົ່ງ​ເສີມ​ພັດທະນາ​ພືດໃຫ້​ທົນ​ທານຫຼາຍຂື້ນ​ ເພື່ອ​ຮອງຮັບຄວາມໝັ້ນຄົງ​ດ້ານ​ສະບຽງອາຫານ​ຂອງ​ໂລກ.

ພວກ​ເຮົາ​ຍັງສັງ​ເກດ​ເຫັນວ່ານັກປະດິດຄິດແຕ່ງ​ຜູ້​ທີ່​ນໍາ​ໃຊ້​ລະບົບຂອງ ລິ​ຂະ​ສິດ ສາມາດ​ຫາ​ລ້ຽງຊີບ​ໄດ້​ ຈາກ​ຜົນງານຂອງ​ພວກ​ເຂົາ​ ຊຶ່ງ​ມີ​ບົດ​ບາດ​ສຳຄັນ​ໃນ​ການ​ສ້າງ​ວິ​ໄສ​ທັດ​​ ແຫ່ງ​ອານາ​ຄົດ​ສີຂຽວ ​ແລະ    ຜົນ​ປະ​ໂ​ຫຍດຢ່າງຫຼວງຫຼາຍທີ່ບໍ່ສາມາດພັນລະນາ ແລະ ນັບໄດ້.

ດັ່ງຄຳເວົ້າຂອງ​ທ່ານ ​ໄອສຕາຍ Einstein ໄດ້ກ່າວໄວ້ວ່າ ພວກເຮົາບໍ່ສາມາດເຮັດສິ່ງດຽວ ຊໍ້າໄປຊໍ້າມາ ​ແລະ ຄາດຫວັງໃຫ້ໄດ້ຜົນຮັບທີ່ແຕກຕ່າງກັນ​ໄດ້, ຖ້າພວກເຮົາຕ້ອງການຜົນຮັບທີ່ແຕກຕ່າງ  ພວກເຮົາຕ້ອງມີນະວັດຕະກຳໃນ ວິທີການ​ຄິດ, ຂະບວນການຜະລິດ ​ແລະ ​ຮູບແບບ​ທຸລະ​ກິດ​ ຂອງ​ພວກ​ເຮົາ​. ພວກເຮົາມີຄວາມຮັບຜິດຊອບຕໍ່ ​​ທາງ​ເລືອກ​ທີ່​ພວກ​ເຮົາ​ເລືອກ​ໃນ​ທຸກໆມື້, ຜະລິດ​ຕະພັນ​ທີ່​ພວກ​ເຮົາ​ຊື້, ການ​ວິ​ໄຈທີ່​ເຮົາ​ໃຫ້​ທືນສະໜັບສະໜູນ, ບໍລິສັດ​ທີ່​ເຮົາ​ສະໜັບສະໜູນ, ນະ​ໂຍບາຍ ​ແລະ ກົດໝາຍ ທີ່​ເຮົາ​ສ້າງ ຈະ​ເປັນ​ໂຕ​ກຳນົດ​ອະນາ​ຄົດ​​ສີຂຽວຂອງ​ພວກ​ເຮົາ. ​​ດ້ວຍນະ​ວັດຕະ​ກຳ​ແຫ່ງ​ຫົວຄິດ​ປະດິດ​ສ້າງ ​ແລະ ​ຍຸດ​ທະ​ສາດການ​ນໍາ​ໃຊ້​ສິດ​ຂອງ​ຊັບ​ສິນ​ທາງ​ປັນຍາ​​ ກໍ່ສາມາດເອື້ອມມືເຖິງອະນາຄົດທີ່ຍືນຍົງ.

​ເຂົ້າມາ​ຮ່ວມ​ກັບ​ພວກ​ເຮົາ​ ໃນ​ການ​ຄົ້ນຫາບົດບາດ​ຂອງ​ ນະ​ວັດຕະ​ກຳ ​ແລະ ສິດ​ຂອງ​ຊັບ​ສິນ​ທາງ​ປັນຍາ​ ໃນ​ການ​ເປີດ​ເສັ້ນທາງ​ສູ່​ອານາ​ຄົດ​ສີຂຽວ, ​ແບ່ງປັນ​ນະ​ວັດຕະ​ກຳ​ສີຂຽວທີ່​ທ່ານ​ມັກ ​​ແລະ ບອກ​ພວກ​ເຮົາ​ວ່າ​ທ່ານ​ຈະ​ສົ່ງ​ເສີມ​ຄວາມ​ສາມາດ​ສີຂຽວຂອງ​ທ່ານຄື​ແນວ​​ໃດ”.

ບໍ່ວ່າຍາມໃດ ພັກ ແລະ ລັດຖະບານ ສປປ ລາວ ເຮົາ ກໍໃຫ້ຄວາມສໍາຄັນ, ຊູກຍູ້ສົ່ງເສີມ ກັບການພັດທະນາຊັບພະຍາ ກອນມະນຸດ ໃນການປະດິດຄິດສ້າງ ແລະ ປະດິດຄິດແຕ່ງ ຊຶ່ງພວກເຮົາກໍໄດ້ຈັດງານມະຫາກຳຊັບສິນທາງປັນຍາ ແລະ ພິທີສະເຫຼີມສະຫຼອງວັນຊັບສິນທາງປັນຍາໂລກ ເພື່ອເອກອ້າງຜົນງານຂອງນັກປະດິດສ້າງ ແລະ ປະດິດຄິດແຕ່ງໃນໄລຍະຜ່ານມາ; ສໍາລັບປີນີ້, ເນື່ອງຈາກ ສປປ ລາວເຮົາ ແລະ ປະຊາຄົມໂລກ ກໍາລັງປະເຊີນໜ້າກັບໄພພິບັດຄັ້ງໃຫຍ່ ກໍຄືພະຍາດອັກເສບປອດຈຸລາໂລກສາຍພັນໃໝ່ ຫຼື (COVID-19) ທີ່ລ່າຊີວິດຜູ້ຄົນໄປຈຳນວນຫຼວງຫຼາຍ, ຊຶ່ງສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ແລະ ເສດຖະກິດໂດຍລວມ, ເຮັດໃຫ້ເກີດຄວາມເສຍຫາຍໜັກ ແລະ ຍາກທີ່ຈະປະເມີນໄດ້. ໃນສະພາບການດັ່ງກ່າວນີ້ ພັກ ແລະ ລັດຖະບານ ສປປ ລາວ ກໍໄດ້​ເອົາ​ໃຈ​ໃສ່​ຕໍ່ປວງ​ຊົນ​ລາວ​ທັງ​ຊາດ ເພື່ອຕ້ານພະຍາດອັກເສບປອດຈຸລາໂລກສາຍພັນໃໝ່ (COVID-19) ​ໃນ​ຂອບ​ເຂດ​ທົ່ວ​ປະ​ເທດ; ສະ​ນັ້ນ ໃນປີນີ້ ຈຶ່ງບໍ່ມີການຈັດງານມະຫາກໍາຊັບສິນທາງປັນຍາ ຫຼື ຈັດພິທີ​ສະ​ເຫຼີມສະຫຼອງວັນ​ຊັບ​ສິນ​ທາງ​ປັນຍາ​ໂລກ. ເຖິງວ່າສະພາບປະຈຸບັນຈະເປັນເຊັ່ນນັ້ນກໍຕາມ ແຕ່ຊັບສິນທາງປັນຍາ ກໍບໍ່ເຄີຍທີ່ຈະຢຸດນິ້ງ ໃນພາວະວິກິດເຊັ່ນນີ້ ນັກວິທະຍາສາດ, ນັກຄົ້ນຄວ້າ ໃນລະດັບສາກົນ ກໍໄດ້ທຸ້ມເທສະຕິປັນຍາ, ເຫື່ອແຮງ ເພື່ອຫາຫົນທາງໃນການສ້າງຢາຮັກສາພະຍາດ (COVID-19) ຢ່າງບໍ່ຢຸດຢ່ອນ, ໂດຍແນໃສ່ມະນຸດສະທຳ ແລະ ຄວາມຜາສຸກຂອງປະຊາຄົມໂລກເປັນຫຼັກ, ດັ່ງທີ່ບັນດາທ່ານຊາບຜ່ານສື່ຕ່າງໆ ກ່ຽວກັບ ຢາຮັກສາພະຍາດ (COVID-19) ຊຶ່ງທາງ ສປ ຈີນ ຮ່ວມກັບ ຍີ່ປຸ່ນໃນການຜະລິດຢາ ໂດຍນໍາໃຊ້ຢາຕ້ານໄຂ້ຫວັດ ທີ່ເປັນສິດທິບັດຂອງປະເທດຍີ່ປຸ່ນ ກັບຜູ້ປ່ວຍໂລກໂຄວິດ 19 (COVID-19), ຊຶ່ງສາມາດຮັກສາຜູ້ປ່ວຍໄດ້ຢ່າງມີປະສິດທິ  ຜົນ,[1] ຊຶ່ງໝາກຜົນຈາກການປະດິດສ້າງທີ່ເກີດຂຶ້ນທັງໝົດນັ້ນ ລ້ວນແລ້ວແຕ່ແມ່ນຊັບສິນທາງປັນຍາທັງໝົດ.

ການຂະຫຍາຍຕົວຂອງພາກອຸດສາຫະກຳ ກໍໃຫ້ເກີດຄວາມຈະເລີນເຕີບໂຕທາງດ້ານເສດຖະກິດ ທີ່ກ້າວກະໂດດໃນພູມມິພາກຕ່າງໆ ທົ່ວໂລກ ແຕ່ການຈະເລີນເຕີບໂຕດັ່ງກ່າວ ບາງຄັ້ງໄດ້ນຳໄປສູ່ຄວາມເສຍຫາຍຂອງຊັບພະຍາກອນທຳມະຊາດ ແລະ ສິ່ງແວດລ້ອມ ເກີດບັນຫາມົນລະພາວະເປັນພິດໃນດ້ານຕ່າງໆ ທັງທາງນໍ້າ, ອາກາດ ແລະ ດິນ, ຊຶ່ງສິ່ງເຫຼົ່ານີ້ ນັບມື້ທະວີຮຸນແຮງຂຶ້ນ ແລະ ສົ່ງຜົນຕໍ່ປະຊາຄົມໂລກ ທັງດ້ານເສດຖະກິດ ແລະ ສັງຄົມຢ່າງຫຼີກລ້ຽງບໍ່ໄດ້. ສະນັ້ນ, ການເພີ່ມທະວີ ແລະ ການແກ້ໄຂບັນຫາທາງດ້ານສິ່ງແວດລ້ອມ ທີ່ຄວບຄູ່ໄປກັບ ການພັດທະນາເສດຖະກິດ ໂດຍສະເພາະອຸດສາຫະກຳ, ການຜະລິດ, ລວມທັງຄວາມຕ້ອງການເພີ່ມຂຶ້ນຂອງການບໍລິໂພກສີຂຽວ ຈຶ່ງມີຄວາມສຳຄັນ.

ຕໍ່ກັບບັນຫາດັ່ງກ່າວຂ້າງເທິງນັ້ນ, ກະຊວງວິທະຍາສາດ ແລະ ເຕັກໂນໂລຊີ ໄດ້ກຳນົດຄາດໝາຍລະດັບຊາດ ກ່ຽວກັບ ວຽກງານວິທະຍາສາດ ແລະ ເຕັກໂນໂລຊີ 5 ປີ (2016-2020) ຊຶ່ງລັດຖະບານໄດ້ກຳນົດຄາດໝາຍພັດທະນາວິທະຍາສາດ ແລະ ເຕັກໂນໂລຊີ ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ ໄລຍະ 5 ປີ ຄັ້ງທີ VIII, ເນັ້ນໜັກໃຫ້ຂະແໜງວິທະຍາສາດ ແລະ ເຕັກໂນໂລຊີ ໂດຍ “ສຸມໃສ່ການສົ່ງເສີມການປະດິດສ້າງ ແລະ ການນໍາໃຊ້ ວິທະຍາສາດ-ເຕັກໂນໂລຊີ ເພື່ອໃຫ້ກາຍເປັນປັດໄຈສໍາຄັນໃນການຂະຫຍາຍກຳລັງການຜະລິດ”, ໄດ້ນໍາແຜນວຽກຈຸດສຸມຂອງແຜນພັດທະນາເສດຖະກິດສັງຄົມ ຕາມທິດສີຂຽວແບບຍືນຍົງ ເຂົ້າໃນແຜນພັດທະນາວິທະຍາສາດ, ເຕັກໂນໂລຊີ ແລະ ນະວັດຕະກຳ 5 ປີ (2021-2025).

ແລະ 1 ໃນ 6 ແຜນງານໃຫຍ່ຂອງແຜນພັດທະນາວິທະຍາສາດ ແລະ ເຕັກໂນໂລຊີຂອງກະຊວງ ໂດຍສະເພາະ ແຜນວຽກຈຸດສຸມທີ 4 ທີ່ຄົ້ນຄວ້ານຳໃຊ້ ແລະ ພັດທະນາວິທະຍາສາດ ແລະ ເຕັກໂນໂລຊີ ເພື່ອຊຸກຍູ້ການພັດທະນາທາງດ້ານເສດຖະກິດ-ສັງຄົມ ແລະ ການປົກປັກຮັກສາສິິ່ງແວດລ້ອມ ຕາມທິດສີຂຽວ ແລະ ຍືນຍົງ, ທີ່ດຳເນີນຢູ່ນັ້ນ ກໍມີຫຼາຍອັນພົ້ນເດັ່ນ ເປັນຕົ້ນແມ່ນ ໄດ້ຊຸກຍູ້ສົ່ງເສີມການຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີ ໂດຍນຳໃຊ້ກອງທຶນພັດທະນາ ວິທະຍາສາດ ແລະ ເຕັກໂນໂລຊີ ລວມທັງໝົດ ມີຈຳນວນ 104 ໂຄງການ, ຊຶ່ງບັນດາໂຄງການຄົ້ນຄວ້າເຫຼົ່ານັັ້ນ ປະກອບມີຫຼາຍຂະແໜງ ການຈາກສູນກາງ ຈໍານວນ 65 ໂຄງການ ມູນຄ່າ 37,299,600,000 ກີບ (ສາມສີບເຈັດຕື້ສອຍຮ້ອຍເກົ້າສີບເກົ້າລ້ານຫົກແສນກີບຖ້ວນ) ແລະ ຂັັ້ນທ້ອງຖິິ່ນມີຈຳນວນ 24 ໂຄງການ ມູນຄ່າ 5,123,700,000 ກີບ (ຫ້າຕື້ໜຶ່ງຮ້າຍຊາວສາມລ້ານເຈັດແສນກີບຖ້ວນ) ແລະ ບັນດາມະຫາວິທະຍາໄລ 15 ໂຄງການ ມູນຄ່າ 1,576,700,000 ກີບ (ໜຶ່ງຕື້ຫ້າຮ້ອຍເຈັດສີບຫົກລ້ານເຈັດແສນກີບຖ້ວນ). ໃນນັັ້ນ, ມີຫຼາຍໂຄງການທີິ່ພົ້ນເດັັ່ນເປັນຕົ້ນ: ໄດ້ຄົ້ນຄວ້າສຳເລັດພືດເປັນຍາ 20 ກວ່າຊະນິດ ທີິ່ມີສານສາມາດໃຊ້ເປັນຢາໄດ້ ຄົ້ນຄວ້າປັບປຸງຄຸນນະພາບ ແລະ ສະມັດຕະພາບເຂົ້າໄກ່ນ້ອຍແຂວງຊຽງຂວາງ, ຄົ້ນຄວ້າເຄື່ອງຢອດເມັດເຂົ້າ ສໍາລັບນາໂນນ, ຄົ້ນຄວ້າເຄື່ອງອົບແຫ້ງຜະລິດຕະພັນກະສິກຳ ທີິ່ນຳໃຊ້ພະລັງານ ແບບປະສົມປະສານ, ຄົ້ນຄວ້ານໍາໃຊ້ເສັັ້ນໄຍກ້ວຍຜະລິດວັດສະດຸຫຸ້ມຫໍໍ່ສິນຄ້າ, ຄົ້ນຄວ້າເຮືອບິນບໍໍ່ມີຄົນຂັບ, ຄົ້ນຄວ້າສ້າງຫຸ່ນຍົນເກັບກູ້ ແລະ ທຳລາຍລະເບີດ, ຄົ້ນຄວ້າປັບປຸງແນວພັນເຂົ້າຢູ່ ສູນຄົ້ນຄວ້າກະສິກຳທ່າສະໂນ ແຂວງສະຫວັນນະເຂດ ຊຶ່ງສາມາດສ້າງແນວພັນເຂົ້າຊະນິດໃໝ່ໄດ້ 2 ແນວພັນ. ໄດ້ຄົ້ນພົບພືດທີິ່ເປັນຢາ ຊຶິ່ງສາມາສະກັດເປັນຢາຕ້ານເຊື້ອມະເຮັງ ແລະ ຕົ້ນພັນພືດຊະນິດໃໝ່ ແລະ ອື່ນໆ. ຊຶ່ງຖ້າເວົ້າເຖິງການຄົ້ນຄວ້າ, ການປະດິດສ້າງທີ່ກ່າວມາເບື້ອງຕົ້ນນັ້ນ ລ້ວນແລ້ວແຕ່ຕິດພັນກັບຊັບສິນທາງປັນຍາ.

ໃນໄລຍະໜຶ່ງປີທີ່ຜ່ານມາ, ສະເພາະການສົ່ງເສີມຊັບສິນທາງປັນຍາໃນ ສປປ ລາວ ນັ້ນກໍມີທ່າຂະຫຍາຍຕົວ ຫຼັງການສືບຕໍ່ສົ່ງເສີມຢ່າງຕໍ່ເນື່ອງ ກ່ຽວກັບ ພາລະບົດບາດ ແລະ ຄວາມສຳຄັນຂອງວຽກງານຊັບສິນທາງປັນຍາ ເຊັ່ນ: ສິດທິບັດ, ອະນຸສິດທິບັດ, ແບບອຸດສາຫະກຳ, ແບບຜັງວົງຈອນລວມ, ເຄື່ອງ   ໝາຍການຄ້າ, ຖິ່ນກໍາເນີດ, ພັນພືດໃໝ່, ລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ພູມປັນຍາພື້ນບ້ານອັນເປັນມູນເຊື້ອ ​ໃນການພັດທະນາເສດຖະກິດ-ສັງຄົມ ແລະ ວັດທະນະທຳແບບຍືນຍົງ, ຊຶ່ງໄດ້ຈັດສຳມະນາສ້າງຄວາມເຂົ້າໃຈຕໍ່ຜູ້ປະກອບການ, ທັງພາກລັດ ແລະ ເອກະຊົນໃນຂອບເຂດທົ່ວປະເທດ, ຊຶ່ງໄດ້ລົງຕິດຕາມສະພາບຕົວຈິງ ຂອງຜະລິດຕະພັນທີ່ມີທ່າແຮງໃນບັນດາແຂວງທົ່ວປະເທດ. ປະຈຸບັນໄດ້ສຳເລັດການກະກຽມຈົດທະບຽນຖິ່ນກຳເນີດ ໄດ້ຍື່ນຂໍຈົດທະບຽນສິນຄ້າຖິ່ນກຳເນີດຄື: ຊາປາກຊ່ອງ ຂອງແຂວງຈຳປາສັກ, ຊາກໍແມນ ຂອງແຂວງຜົ້ງສາລີ, ຜ້າໄໝຫຼວງພະບາງ ຂອງແຂວງຫຼວງພະບາງ ແລະ ຜ້າໄໝຫົວພັນ ຂອງແຂວງຫົວພັນ. ນັ້ນກໍເປັນການຊຸກຍູ້ສົ່ງເສີມ ໂດຍນໍາໃຊ້ຊັບພະຍາກອນທຳມະຊາດ ເພື່ອສືບຕໍ່ຜັນຂະຫຍາຍການພັດທະນາຕາມທິດສີຂຽວແບບຍືນຍົງ ໂດຍການນໍາໃຊ້ຊັບສິນທາງປັນຍາ ເຂົ້າໃນການສົ່ງເສີມໃຫ້ມີປະສິດທິພາບ ແລະ ປະສິດທິຜົນສູງ. ອີກດ້ານໜຶ່ງ, ກະຊວງວິທະຍາສາດ ແລະ ເຕັກໂນໂລຊີ ໄດ້ສຳເລັດ ການເຮັດຂໍ້ຕົກລົງວ່າດ້ວຍພັນພືດໃໝ່ ແລະ ໄດ້ເປີດໃຫ້ບໍລິການຈົດທະບຽນພັນພືດໃໝ່ອີກດ້ວຍ ເພື່ອຜັນຂະຫຍາຍ ແລະ ຈັດຕັ້ງປະຕິບັດກົດໝາຍວ່າດ້ວຍຊັບສິນທາງປັນຍາ, ພ້ອມນັ້ນ ກໍເປີດການນຳໃຊ້ລະບົບການເຂົ້າເຖິງຂໍ້ມູນ ກ່ຽວກັບຊັບສິນທາງປັນຍາ (IP portal) ແລະ ກະກຽມຄວາມພ້ອມ ທີ່ຈະເປີດໃຫ້ບໍລິການຮັບຄຳຮ້ອງຜ່ານທາງອອນລາຍ, ຊຶ່ງຈະເປັນໜຶ່ງທາງເລືອກທີ່ຊ່ວຍເຮັດໃຫ້ຜູ້ປະກອບການ ສະດວກແກ່ການເຂົ້າເຖິງຂໍ້ມູນ ແລະ ຍື່ນຄໍາຮ້ອງຂໍຈົດທະບຽນໄດ້.

ວຽກງານຊັບສິນທາງປັນຍາ ເປັນວຽກງານທີ່ສໍາຄັນໃນການພັດທະນາເສດຖະກິດສັງຄົມ ແລະ ວັດທະນະທໍາແບບຍືນຍົງຂອງປະເທດເຮົາ ຈຶ່ງໄດ້ເຜີຍແຜ່ວັນສໍາຄັນດັ່ງກ່າວໃຫ້ມວນຊົນໄດ້ຮັບຊາບ.

ໃນ​ໂອກາດ​ນີ້, ກະຊວງວິທະຍາສາດ ແລະ ເຕັກໂນໂລຊີ ຂໍ​ເຊີນ​ຊວນມາ​ຍັງບັນດາເຍົາວະຊົນ, ນັກສຶກສາ, ນັກ​ຄົ້ນ​ຄວ້າ, ນັກວິທະຍາສາດ, ນັກ​ປະດິດສ້າງ, ນັກປະດິດຄິດແຕ່ງ ​ແລະ ຜູ້ທີ່ເປັນເຈົ້າຂອງຊັບສິນທາງປັນຍາ, ຜູ້​ປະກອບ​ການ ນັກທຸລະກິດ ພໍ່ຄ້າ​ຊາວ​ຂາຍ​ທີ່ມີຄວາມສາມາດ ສັກກະຍະພາບສະເພາະໃນຕົວ ທີ່ຢູ່​ພາຍ​ໃນ ແລະ ຕ່າງປະ​ເທດ ​ເຂົ້າ​ຮ່ວມກັບ​ພວກ​ເຮົາ​ ໃນ​ການ​ຄົ້ນຫາບົດບາດ​ຂອງ​ນະ​ວັດຕະ​ກຳ ​ແລະ ສິດ​ຂອງ​ຊັບ​ສິນ​ທາງ​ປັນຍາ​ ໃນ​ການສ້າງນະວັດຕະກຳ ເພື່ອອະນາຄົດສີຂຽວ.

[1] https://thestandard.co/chinese-researchers-found-avigan-virus-of-japanese-could-cure-coronavirus/

ສະໜັບສະໜູນໂດຍ:

ໂຄງການຮ່ວມມືລາວ – ສະຫະລັດອາເມລິກາ
ເພື່ອການເຊື່ອມໂຍງ ສາກົນ ແລະ ອາຊຽນ (USAID LUNA II)

footer 1

ການສ້າງເວັບໄຊນີ້ ໄດ້ຮັບການສະໜັບສະໜູນຈາກປະຊາຊົນສະຫະລັດອາເມລິກາ ໂດຍຜ່ານອົງການພັດທະນາສາກົນສະຫະລັດອາເມລິກາ (USAID) ເຊິ່ງອົງການ USAID ຫຼື ລັດຖະບານສະຫະລັດອາເມລິກາ ຈະບໍ່ຮັບຜິດຊອບຕໍ່ຂໍ້ມູນທີ່ເອົາລົງໃນເວັບໄຊດັ່ງກ່າວ