ໃນຕອນເຊົ້າຂອງວັນທີ 18 ມີຖຸນາ 2020 ທີ່ຫ້ອງປະຊຸມ ຊັ້ນ 4 ຂອງກະຊວງ ວິທະຍາສາດ ແລະ ເຕັກໂນໂລຊີ, ໄດ້ຈັດກອງປະຊຸມວິຊາການຖອດຖອນ ແລະ ແລກປ່ຽນບົດຮຽນ ກ່ຽວກັບ ການນໍາໃຊ້ ລະບົບບໍລິຫານຈັດການຊັບສິນອຸດສາຫະກໍາ IPAS (Industrial Property Administrator System) ໃຫ້ແກ່ພະນັກງານພາຍໃນກົມຊັບສິນທາງປັນຍາ. ມີຜູ້ເຂົ້າຮ່ວມທັງໝົດ 24 ທ່ານ ຜູ້ເຂົ້າຮ່ວມໄດ້ຮັບຟັງການບັນຍາຍຈາກວິທະຍາກອນ ໃນຫົວຂໍ້ຕ່າງໆ ເຊັ່ນ: ສະເໜີບັນຫາປະຈຸບັນ ຫຼື ວຽກຄົງຄ້າງທີ່ມີຢູ່ໃນລະບົບ IPAS, ສະເໜີຂັ້ນຕອນການນຳໃຊ້ລະບົບຕາມ ແຜນວາດຂັ້ນຕອນຂອງການປະຕິບັດວຽກງານ ໃນລະບົບບໍລິຫານຈັດການຊັບສິນອຸດສາຫະກໍາ (Workflow) ຂອງ ສິດທິບັດ, ແບບອຸດສາຫະກຳ ແລະ ເຄື່ອງໝາຍການຄ້າ. ພ້ອມທັງປຶກສາຫາລື ເຖິງບັນຫາ ແລະ ວິທີແກ້ໄຂຂອງຜູ້ນຳໃຊ້ລະບົບ. ໂດຍໃຫ້ກຽດເປັນປະທານຂອງ ທ່ານ ມາຄະ ຈັນທະລາ, ຮອງຫົວໜ້າກົມຊັບສິນທາງປັນຍາ.
ໂອກາດນີ້, ທ່ານ ມາຄະ ຈັນທະລາ, ຮອງຫົວໜ້າກົມຊັບສິນທາງປັນຍາ ໄດ້ມີຄໍາເຫັນໂອ້ລົມຕໍ່ກອງປະຊຸມຄັ້ງນີ້ ຊື່ງໄດ້ເນັ້ນໜັກໃຫ້ພະນັກງານແຕ່ລະພະແນກເອົາໃຈໃສ່ໃນການຝຶກອົບຮົມໃນຄັ້ງນີ້ ເພື່ອນຳເອົາວຽກຄວາມຮູ້ດັ່ງກ່າວ ປະກອບສ່ວນເຂົ້າໃນການພັດທະນາ ວຽກງານ, ສ້າງຄວາມເຂັ້ມແຂງທາງດ້ານວິຊາການ, ໃນການນຳໃຊ້ລະບົບ IPAS (Industrial Property Administrator System) ລະບົບບໍລິຫານຈັດການຊັບສິນອຸດສາຫະກໍາ ເຂົ້າໃນການປະຕິບັດວຽກງານຕົວຈິງ ເພື່ອກະກຽມຮອງຮັບການຈົດທະບຽນທາງອອນລາຍ.