ກົມຊັບສິນທາງປັນຍາ, ກະຊວງອຸດສາຫະກຳ ແລະ ການຄ້າ, ໄດ້ຈັດກອງປະຊຸມ ປະກອບຄຳເຫັນໃສ່ ຮ່າງຂໍ້ຕົກລົງ ວ່າດ້ວຍສິດທິບັດ ແລະ ອະນຸສິດທິບັດ, ໃນວັນທີ 02 ມິຖຸນາ 2022 ຜ່ານມາ, ທີ່ຫ້ອງປະຊຸມຊັ້ນ 1, ພາຍໃຕ້ການເປັນປະທານຂອງ ທ່ານ ສັນຕິສຸກ ພູນສະຫວັດ, ຫົວໜ້າກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ.
ໃນກອງປະຊຸມຄັ້ງນີ້ ມີທ່ານ ມາຄະ ຈັນທະລາ, ຮອງຫົວໜ້າກົມຊັບສິນທາງປັນຍາ, ທ່ານ ນາງ ສີດາ ຢູຕຣີຈັນທະຈັກ, ຮອງຫົວໜ້າກົມຊັບສິນທາງປັນຍາ, ຜູ້ຕາງໜ້າຈາກ ຫ້ອງການ, ກົມ, ສະຖາບັນ ກະຊວງອຸດສາຫະກໍາ ແລະ ການຄ້າ, ແລະ ພະນັກງານທີ່ກ່ຽວຂ້ອງຂອງ ກົມຊັບສິນທາງປັນຍາ ເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ເພື່ອທາບທາມຄໍາຄິດເຫັນຈາກບັນດາຜູ້ເຂົ້າຮ່ວມໃສ່ໃນ ຮ່າງຂໍ້ຕົກລົງ ວ່າດ້ວຍສິດທິບັດ ແລະ ອະນຸສິດທິບັດ, ເພື່ອເຮັດໃຫ້ຮ່າງຂໍ້ຕົກລົງສະບັບນີ້ ມີເນື້ອໃນທີ່ຄົບຖວ້ນສົມບູນຂຶ້ນຕື່ມ, ໃນການກຳນົດຫຼັກການ ແລະ ລະບຽບການ ກ່ຽວກັບການຈັດຕັ້ງປະຕິບັດວຽກງານ ສິດທິບັດ ແລະ ອະນຸສິດທິບັດ ເປັນຕົ້ນ ການອອກ ສິດທິບັດ ແລະ ອະນຸສິດທິບັດ, ການດໍາເນີນການຫຼັງການອອກ ສິດທິບັດ ແລະ ອະນຸສິດທິບັດ, ການເປັນຜູ້ຕາງໜ້າ ແລະ ອົງການຄຸ້ມຄອງວຽກງານສິດທິບັດ ແລະ ອະນຸສິດທິບັດ ເພື່ອແນໃສ່ຜັນຂະຫຍາຍກົດໝາຍ ວ່າດ້ວຍຊັບສິນທາງປັນຍາ ໃຫ້ເປັນເອກະພາບໃນຂອບເຂດທົ່ວປະເທດ ແລະ ເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.
ໃນຮ່າງຂໍ້ຕົກລົງສະບັບດັ່ງກ່າວ ປະກອບດ້ວຍ 8 ໝວດ, 44 ມາດຕາ; ໃນໝວດທີ 1 ບົດບັນຍັດທົ່ວໄປ ປະກອບມີ 3 ມາດຕາ; ໝວດທີ 2 ເງື່ອນໄຂ ແລະ ຂັ້ນຕອນການຂໍຮັບສິດທິບັດ ແລະ ອະນຸສິດທິບັດ ປະກອບມີ 10 ມາດຕາ; ໝວດທີ 3 ການພິຈາລະນາຄໍາຮ້ອງຂໍຮັບສິດທິບັດ ແລະ ອະນຸສິດທິບັດ ປະກອບມີ 15 ມາດຕາ; ໝວດ ທີ 4 ການດຳເນີນການຫຼັງການອອກ ສິດທິບັດ ຫຼື ອະນຸສິດທິບັດ ປະກອບມີ 7 ມາດຕາ; ໝວດທີ 5 ການເປັນຜູ້ຕາງໜ້າໃນການຂໍຮັບສິດທິບັດ ແລະ ອະນຸສິດທິບັດ ແລະ ດໍາເນີນການອື່ນ ປະກອບມີ 2 ມາດຕາ; ໝວດທີ 6 ການສ້າງສຳນວນເອກະສານຂຶ້ນໃໝ່ ປະກອບມີ 2 ມາດຕາ; ໝວດທີ 7 ການຄຸ້ມຄອງວຽກງານສິດທິບັດ ແລະ ອະນຸສິດທິບັດ ປະກອບມີ 3 ມາດຕາ ແລະ ໝວດທີ 8 ບົດບັນຍັດສຸດທ້າຍ ປະກອບມີ 2 ມາດຕາ.
ແລະ ໃນວັນທີ 03 ມິຖຸນາ 2022, ກົມຊັບສິນທາງປັນຍາ ກໍໄດ້ສືບຕໍ່ຈັດກອງປະຊຸມ ປະກອບຄໍາເຫັນໃສ່ ຮ່າງຂໍ້ຕົກລົງ ວ່າດ້ວຍສິດທິບັດ ແລະ ອະນຸສິດທິບັດ ສໍາລັບພາກສ່ວນທຸລະກິດ ທີ່ຫ້ອງປະຊຸມຊັ້ນ 4, ກົມຊັບສິນທາງປັນຍາ, ໂດຍການເປັນປະທານຂອງ ທ່ານ ສັນຕິສຸກ ພູນສະຫວັດ ຫົວໜ້າກົມຊັບສິນທາງປັນຍາ, ໃນກອງປະຊຸມຄັ້ງນີ້ ມີທ່ານ ນ. ສີດາ ຢູຕຣີຈັນທະຈັກ ຮອງຫົວໜ້າກົມຊັບສິນທາງປັນຍາ, ມີບັນດາຫົວໜ້າພະແນກ, ຮອງພະແນກ, ສູນ ຂອງກົມຊັບສິນທາງປັນຍາ, ບັນດາພາກສ່ວນທຸລະກິດ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.
ຂ່າວ ແລະ ຮູບພາບ: ພະແນກສົ່ງເສີມ ແລະ ພັດທະນາ ຊັບສິນທາງປັນຍາ