ໃນວັນທີ 04 ຕຸລາ 2025, ທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ນໍາພາຄະນະ ຈໍານວນ 02 ທ່ານ ເດີນທາງໄປຮ່ວມກອງປະຊຸມສາກົນ ໃນຫົວຂໍ້: “ສົ່ງເສີມການນໍາໃຊ້ຊັບສິນທາງປັນຍາ ເຂົ້າໃນວຽກງານເປົ້າໝາຍສະຫັດສະວັດເພື່ອການພັດທະນາ SDGs” , ຮ່ວມກັບບັນດາຕົວແທນຈາກອົງການຊັບສິນທາງປັນຍາທັງໃນພາກພື້ນ ແລະ ສາກົນ, ຕາມການເຊື້ອເຊີນ ຂອງອົງການສິດທິບັດ ຍີ່ປຸ່ນ (JPO), ກອງປະຊຸມປຶກສາຫາລືດັ່ງກ່າວ ເປັນຫນື່ງໃນກອງປະຊຸມ ຄູ່ຂະຫນານກັບ ງານວາງສະແດງໂລກ ໂອຊາກາ 2025 ແລະ ໄດ້ຮັບກຽດ ກ່າວເປີດພິທີໂດຍ: ທ່ານ ດາເຣນ ຕັງ, ຜູ້ອໍານວຍການໃຫຍ່ອົງການຊັບສິນທາງປັນຍາໂລກ (WIPO), ແລະ ທ່ານ ຄາຊາອິ ຢາຊູຢູກິ, ຫົວໜ້າຫ້ອງການສິດທິບັດຍີ່ປຸ່ນ (JPO).ໃນເວທີດັ່ງກ່າວ ທ່ານ ໄຊສົມເພັດ ນໍລະສິງ, ໄດ້ນໍາສະເໜີ ການຈັດຕັ້ງປະຕິບັດວຽກງານກ່ຽວກັບ ການນໍາໃຊ້ເຕັກໂນໂລຊີສີຂຽວເຂົ້າໃນການພັດທະນາຂະແໜງກາເຟ ຂອງລາວ ພາຍໃຕ້ໂຄງການ WIPO Green, ເຊິ່ງໄດ້ຮັບການສະໜັບສະໜູນຈາກໂຄງການຊັບສິນທາງປັນຍາໂລກ ແລະ ຈັດຕັ້ງປະຕິບັດໂດຍ ກົມຊັບສິນທາງປັນຍາ. ໂຄງການດັ່ງກ່າວ ແມ່ນໄດ້ຍົກ ການແລກປ່ຽນບົດຮຽນ ການຈັດຕັ້ງປະຕິບັດໂຄງການ, ການໃຫ້ຂໍ້ມູນສິ່ງທ້າທາຍ ໃນການພັດທະນາກາເຟຂອງ ສປປ ລາວ, ການສະເຫນີ ໃຫ້ຊາວນາ ນໍາໃຊ້ເຕັກໂນໂລຊີ ທີ່ທັນສະໄໝ ເພື່ອເປັນອີກຊ່ອງທາງໜຶ່ງ ທີ່ຈະຊ່ວຍແກ້ໄຂສິ່ງທ້າທາຍ, ເພີ່ມປະສິດທິພາບຂອງການຜະລິດ ແລະ ພັດທະນາການສົ່ງອອກກາເຟຂອງລາວ ສູ່ພາກພື້ນ ແລະ ສາກົນເທື່ອລະກ້າວ.
ໃນກອງປະຊຸມຍັງໄດ້ຈັດຂຶ້ນເພື່ອເປັນເວທີ ໃນການປຶກສາຫາລື ແລະ ແລກປ່ຽນບົດຮຽນ ກ່ຽວກັບແນວໂນ້ມໃໝ່ ແລະ ວິທີການປະດິດສ້າງ ເພື່ອແກ້ໄຂບັນຫາສະພາບອາກາດ, ເຊິ່ງຍັງປະກອບດ້ວຍການຖ່າຍທອດເຕັກໂນໂລຢີສິ່ງແວດລ້ອມທີ່ປະສົບຜົນສໍາເລັດ, ລວມທັງບັນດາໂຄງການທີ່ໄດ້ຮັບການສະໜັບສະໜູນໂດຍໂຄງການ WIPO GREEN ຈາກປະເທດ ຟີລິປີ່ນ, ປະເທດ ຍູໂຫລບ, ປະເທດ ອາເມລິການໄຕ້ ເຊື່ງແຕ່ລະປະເທດ ໄດ້ນຳສະເຫນີ ການຈັບຄູ່ເທັກໂນໂລຊີ ເຂົ້າໃນການແກ້ໄຂສະພາບການປ່ຽນແປງຂອງດີນຟ້າອາກາດ.
ນອກຈາກຫົວຂໍ້ດັ່ງກ່າວ, ກອງປະຊຸມຍັງໄດ້ ເປີດໂອກາດໃຫ້ຜູ້ເຂົ້າຮ່ວມໄດ້ຮັບຟັງ ບົດບາດຂອງແມ່ຍິງ ແລະ ຊາວໜຸ່ມ ໃນການມີສ່ວນຮ່ວມ ຂອງ ວຽກງານ ຊັບສິນທາງປັນຍາ. ນອກຈາກນີ້, ຍັງຈະມີພິທີມອບລາງວັນໃຫ້ແກ່ບັນດາບໍລິສັດຍີ່ປຸ່ນ ທີ່ຜ່ານການປະກວດຊະນະເລີດ ໃນການນໍາໃຊ້ຊັບສິນທາງປັນຍາເຂົ້າໃນການແກ້ໄຂບັນຫາຕ່າງໆ ເຊັ່ນ: ການນໍາໃຊ້ຊັບສິນທາງປັນຍາ ເຂົ້າໃນການແກ້ໄຂບັນຫາການປ່ຽນແປງຂອງດິນຟ້າອາດາ, ສົ່ງເສີມການມີສ່ວນຮ່ວມ ແລະ ການເປັນຜູ້ນໍາຂອງແມ່ຍິງ ແລະ ໄວໜຸ່ມ ເປັນຕົ້ນ ເຊິ່ງເປັນໂຄງການຮ່ວມກັນ ລະຫວ່າງ ອົງການສິດທິບັດຍີ່ປຸ່ນ (JPO) ແລະ ອົງການຊັບສິນທາງປັນຍາໂລກ (WIPO) ອີກດ້ວຍ.
