ກົມຊັບສິນທາງປັນຍາ, ກະຊວງອຸດສາຫະກຳ ແລະ ການຄ້າ ຈັດກອງປະຊຸມເຜີຍແຜ່ ກ່ຽວກັບວຽກງານພັນພືດໃໝ່ ພາຍໃຕ້ກົດໝາຍວ່າດ້ວຍຊັບສິນທາງປັນຍາ, ໃນວັນທີ 18 ທັນວາ 2024, ທີ່ ແຂວງ ຫຼວງພະບາງ, ໃຫ້ກຽດເປັນປະທານກ່າວເປີດກອງປະຊຸມໂດຍ ທ່ານ ນ. ຈັນສຸກ ແສງພະຈັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ.

ໃນກອງປະຊຸມຄັ້ງນີ້ ມີບັນດາທ່ານຫົວໜ້າພະແນກ, ຮອງພະແນກ ກົມຊັບສິນທາງປັນຍາ,ກະຊວງອຸດສາຫະກຳ ແລະ ການຄ້າ, ມີຜູ້ຕາງໜ້າຈາກພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ, ສະຖາບັນຄົ້ນຄວ້າກະສິກໍາ ແລະ ປ່າໄມ້ ແລະ ພັດທະນາຊົນນະບົດ, ຕາງໜ້າຈາກຫ້ອງການອຸດສາຫະກໍາ ແລະ ການຄ້າເມືອງ ທັງ 12 ເມືອງອ້ອມຂ້າງແຂວງຫຼວງພະບາງ, ຕາງໜ້າຈາກພະແນກກະສິກໍາ ແລະ ປ່າໄມ້ ແຂວງຫຼວງພະບາງ, ສູນຄົ້ນຄວ້າກະສິກໍາພາກເໜືອ, ຄູ-ອາຈານ ແລະ ນັກຮຽນຈາກມະຫາວິທະຍາໄລ, ຜູ້ປະກອບການ ແລະ ພະນັກງານພະແນກທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້ ແມ່ນໜຶ່ງໃນກິດຈະກຳຂອງ ໂຄງການສົ່ງເສີມການຈົດທະບຽນພັນພືດໃໝ່ ຕົ້ນມອນ, ເພື່ອເຜີຍແຜ່ຄວາມຮູ້ ກ່ຽວກັບວຽກງານພັນພືດໃໝ່, ໃນຮູບແບບການກວດສອບຄຸນລັກສະນະຂອງພັນພືດໃໝ່ ໂດຍສະເພາະ ການປູກທົດລອງເພື່ອໄຈ້ແຍກຄວາມແຕກຕ່າງ, ຄວາມສະໝ່ຳສະເໝີ ແລະ ຄວາມຄົງຕົວຂອງພັນພືດ (DUS Testing) ໃຫ້ບັນດາຂະແໜງການທ້ອງຖິ່ນ, ນັກປັບປຸງພັນພືດ, ຊາວກະສິກອນ, ຄູອາຈານ, ນັກສຶກສາ ແລະ ຜູ້ປະກອບການ ໄດ້ຮັບຮູ້ ແລະ ເຂົ້າໃຈແຈ້ງຕໍ່ວຽກງານດັ່ງກ່າວ ເພື່ອຊຸກຍຸ້ສົ່ງເສີມການຈົດທະບຽນພັນພືດໃໝ່ ແລະ ເປັນການສ້າງມູນຄ່າເພີ່ມໃຫ້ພັນພືດດັ່ງກ່າວ.

ເພື່ອຕອບສະໜອງຄວາມຮຽກຮ້ອງຕ້ອງການ ຕໍ່ກັບການສ້າງສາພັດທະນາປະເທດຊາດໃນໄລຍະໃໝ່ ກໍຄື ການສ້າງເສດຖະກິດແຫ່ງຊາດ ໃຫ້ມີປະສິດທິພາບ ແລະ ປະສິດທິຜົນ, ຊຸກຍູ້ສົ່ງເສີມການຜະລິດເປັນສິນຄ້າ, ການສ້າງມູນຄ່າເພີ່ມ ແລະ ຍົກສູງປະສິດທິພາບ ຂອງການຜະລິດສິນຄ້າ ແລະ ການບໍລິການ ເພື່ອເພີ່ມຄວາມສາມາດໃນການແຂ່ງຂັນໃນຕະຫຼາດພາຍໃນ ແລະ ສາກົນ ເຊິ່ງເປັນປັດໄຈອັນສຳຄັນ ແລະ ຈຳເປັນພາວະວິໄສ ຕໍ່ການເຊື່ອມໂຍງ ເຂົ້າໃນລະບົບເສດຖະກິດສາກົນ ໃນສັດຕະວັດທີ XXI. ການປົກປ້ອງ ແລະ ຄຸ້ມຄອງຊັບສິນທາງປັນຍາເປັນເຄື່ອງມືອັນໜຶ່ງທີ່ສຳຄັນ ໃນການກະຕຸກຊຸກຍູ້ ແລະ ຂັບເຄື່ອນເສດຖະກິດແຫ່ງຊາດ ໃຫ້ມີການຂະຫຍາຍຕົວຢ່າງຕໍ່ເນື່ອງ ໂດຍສະເພາະການປົກປ້ອງພັນພືດໃໝ່ ແມ່ນເປັນປັດໄຈອັນສຳຄັນ ໃນການຊຸກຍູ້ສົ່ງເສີມການປັບປຸງ ແລະ ພັດທະນາພັນພືດໃໝ່ ເຊິ່ງເປັນພັນພືດທີ່ມີ ຄຸນນະພາບດີ, ຜົນຜະລິດສູງ ແລະ ທົນທານ ຕໍ່ກັບການປ່ຽນແປງຂອງສະພາບດິນຟ້າອາກາດ. ນອກຈາກນັ້ນ, ຍັງສ້າງໃຫ້ປະຊາຊົນມີວຽກເຮັດງານທຳ ຍອດຜະລິດຕະພັນພາຍໃນນັບມື້ນັບເຕີບໃຫຍ່ຂະຫຍາຍຕົວ ແລະ ມີຄຸນນະພາບສູງ, ປະກອບສ່ວນສໍາຄັນເຮັດໃຫ້ປະເທດຊາດມີລາຍຮັບເພີ່ມຂືຶ້ນ ເຊິ່ງມີຄວາມຈໍາເປັນຢ່າງຍິ່ງ ໃນການສ້າງຄວາມອາດສາມາດ, ສ້າງຄວາມສໍານິສໍານານທາງດ້ານວິຊາການ ໃຫ້ແກ່ຂະແໜງການທ້ອງຖິ່ນ, ສົ່ງເສີມຜູ້ປະກອບການ ແລະ ນັກປັບປຸງພັນພືດ ກໍຄືບັນດາທ່ານທີ່ເຂົ້າຮ່ວມໃນກອງປະຊຸມໃນຄັ້ງນີ້ ຊື່ງເປັນ ສູນລວມຂອງທ້ອງຖິ່ນ ທີ່ຂັບເຄື່ອນວຽກງານພັນພືດໃໝ່ ແລະ ຂັບເຄື່ອນເສດຖະກິດຂອງຊາດ.

ໃນກອງປະຊຸມເຜີຍແຜ່ຄັ້ງນີ້ ແມ່ນເພຶ່ອສ້າງຄວາມເຂົ້າໃຈແຈ້ງ ໃຫ້ແກ່ພະນັກງານຂັ້ນທ້ອງຖິ່ນ, ນັກປັບປຸງພັນພືດໃໝ່, ຜູ້ປະກອບການ, ອາຈານ ແລະ ນັກສຶກສາ ເຫັນໄດ້ຄວາມສໍາຄັນຂອງວຽກງານພັນພືດໃໝ່ ເປັນຕົ້ນແມ່ນ: ຜົນປະໂຫຍດຂອງການປົກປ້ອງພັນພືດໃໝ່, ກົດໝາຍ ວ່າດ້ວຍຊັບສິນທາງປັນຍາ ກ່ຽວກັບພັນພືດໃໝ່ ທີ່ເປັນພື້ນຖານໃນການຄຸ້ມຄອງ, ຂັ້ນຕອນການຈົດທະບຽນພັນພືດໃໝ່ ແລະ ການປະກອບແບບພິມ ອີກດ້ວຍ.