ໃນວັນທີ 18 ກັນຍາ 2024 ຜ່ານມາ, ທີ່ນະຄອນຫຼວງວຽງຈັນ ສປປ ລາວ ມີກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກິດອາຊຽນ ແລະ ຜູ້ອໍານວຍການໃຫຍ່ອົງການຊັບສິນທາງປັນຍາໂລກ, ໂດຍເປັນປະທານຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ (ອຄ) ທັງເປັນລັດຖະມົນຕີເສດຖະກິດອາຊຽນ ຂອງ ສປປ ລາວ, ໂດຍການເຂົ້າຮ່ວມຂອງ ທ່ານ ດາເຣັນຕັງ, ຜູ້ອໍານວຍການໃຫຍ່ອົງການຊັບສິນທາງປັນຍາໂລກ (WIPO) ມີບັນດາທ່ານລັດຖະມົນຕີເສດຖະກິດປະເທດສະມາຊິກອາຊຽນ ທ່ານລັດຖະມົນຕີກະຊວງການຄ້າ ແລະ ອຸດສາຫະກໍາ ປະເທດຕິມໍເລສເຕ ພ້ອມດ້ວຍບັນດາຄະນະຜູ້ແທນສະມາຊິກອາຊຽນ ເຂົ້າຮ່ວມ.

ທ່ານ ມະໄລທອງ ກົມມະສິດ ກ່າວວ່າ: ປີ 2024 ສປປ ລາວ ໄດ້ຮັບກຽດເປັນປະທານອາຊຽນ ພາຍໃຕ້ຫົວຂໍ້ “ການເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ພ້ອມນັ້ນ ສປປ ລາວ ໄດ້ຮັບກຽດເປັນປະທານໜ່ວຍງານຮ່ວມມືດ້ານຊັບສິນທາງປັນຍາອາຊຽນ ມີທັງກາລະໂອກາດ ແລະ ສິ່ງທ້າທາຍ ເຊິ່ງຮຽກຮ້ອງໃຫ້ອາຊຽນຕ້ອງເພີ່ມທະວີຄວາມສາມັກຄີເປັນໜຶ່ງດຽວ ແລະ ຮ່ວມມືກັນຢ່າງສະໜິດແໜ້ນ ເພື່ອຊຸກຍູ້ການພັດທະນາເຕັກໂນໂລຊີ ແລະ ນະວັດຕະກໍາ ເຂົ້າໃນວຽກງານຊັບສິນທາງປັນຍາ ເພື່ອປະກອບສ່ວນຊຸກຍູ້ການຫັນເປັນດີຈີຕອນ ໃນພາກພື້ນອາຊຽນ ເທື່ອລະກ້າວ.

ອາຊຽນ ແລະ ອົງການຊັບສິນທາງປັນຍາໂລກ ເປັນຄູ່ຮ່ວມມືທີ່ຍາວນານ ໃນດ້ານວຽກງານ ຊັບສິນທາງປັນຍາ ສະແດງອອກໃນຜົນສຳເລັດຫຼາຍດ້ານ ເປັນຕົ້ນຜົນສໍາເລັດໃນການລົງນາມ ໃນບົດບັນທຶກຄວາມເຂົ້າໃຈ ລະຫວ່າງ ອາຊຽນ ແລະ ອົງການຊັບສິນທາງປັນຍາໂລກ ວ່າດ້ວຍການຂະຫາຍາຍການຮ່ວມມືໃນການສົ່ງເສີມ ຈຸນລະວິສະຫະກິດ ວິສະຫະກິດຂະໜາດນ້ອຍ-ຂະໜາດກາງ (SMEs) ການນໍາໃຊ້ເຕັກໂນໂລຊີດິຈີຕອນ ການນໍາໃຊ້ຊັບສິນທາງປັນຍາ ໃຫ້ເປັນສິນເຊື່ອ ການນໍາໃຊ້ຊັບສິນທາງປັນຍາໃນອຸດສາຫະກໍາສ້າງສັນ ໃນເດືອນສິງຫາປີຜ່ານມາ ຜົນສໍາເລັດດັ່ງກ່າວ ເປັນບາດກ້າວສຳຄັນ ໃນການເພີ່ມທະວີການຮ່ວມມື ແລະ ຍົກສູງບົດບາດຄວາມສໍາຄັນຂອງວຽກງານຊັບສິນທາງປັນຍາໃນພາກພື້ນອາຊຽນ ໃຫ້ກ້າວສູ່ສາກົນ.

ກອງປະຊຸມຄັ້ງນີ້ ສະແດງເຖິງຄວາມໝາຍໝັ້ນ ທີ່ຈະຮ່ວມມືກັນໃນການຊຸກຍູ້ການຈັດຕັ້ງປະຕິບັດແຜນປະຕິບັດງານດ້ານຊັບສິນທາງປັນຍາອາຊຽນ ສໍາລັບປີ 2016-2025 ໃຫ້ບັນລຸຜົນສໍາເລັດຢ່າງເປັນຮູບປະທໍາ ໂດຍສະເພາະ ການທົບທວນສັນຍາການຮ່ວມມືດ້ານຊັບສິນທາງປັນຍາອາຊຽນ ທີ່ເປັນໜຶ່ງໃນແຜນວຽກບູລິມະສິດດ້ານເສດຖະກິດອາຊຽນ ພາຍໃຕ້ການເປັນປະທານອາຊຽນຂອງ ສປປ ລາວ ປີ 2024 ອົງ ການຊັບສິນທາງປັນຍາໂລກໄດ້ໃຫ້ການສະໜັບສະໜູນ ໃນການຈັດຕັ້ງປະຕິບັດແຜນວຽກດັ່ງກ່າວ ຢ່າງມີຜົນສຳເລັດ ປີນີ້ ອາຊຽນພວມກະກຽມສ້າງແຜນຍຸດທະສາດການຮ່ວມມືດ້ານວຽກງານຊັບສິນທາງປັນຍາອາຊຽນ 2045 ເພື່ອເພີ່ມທະວີການຮ່ວມມືເຊິ່ງກັນ ແລະ ກັນ ກໍານົດທິດທາງການພັດທະນາວຽກງານຊັບສິນທາງປັນຍາ ໃຫ້ກ້າວສູ່ລະດັບສາກົນ ເທື່ອລະກ້າວ ການປຶກສາຫາລືຄັ້ງນີ້ ເປັນໂອກາດດີໃນການແລກປ່ຽນຄໍາຄິດຄໍາເຫັນ ເພື່ອໝູນໃຊ້ວຽກງານ ຊັບສິນທາງປັນຍາ ເຂົ້າໃນການຊຸກຍູ້ການເຕີບໂຕເສດຖະກິດສີຂຽວ ເສດຖະກິດສີຟ້າ ເສດຖະກິດສ້າງສັນ ເສດຖະກິດດີຈີຕອນ ແລະ ເສດຖະກິດວິທະຍາສາດ ເຕັກໂນໂລຊີ ແລະ ນະວັດຕະກຳ ເພື່ອກໍານົດທິດທາງການຮ່ວມມືດ້ານຊັບສິນທາງປັນຍາ ຢ່າງມີປະສິດຜົນ.

ຂ່າວ: ກົມຊັບສິນທາງປັນຍາ