DIP: 021 213470-148 | IP Service Center: 021 218710

ກົມຊັບສິນທາງປັນຍາ

ກະຊວງອຸດສາຫະກຳ ແລະ ການຄ້າ

ກຊປ ຈັດກອງປະຊຸມ ກະກຽມຈົດທະບຽນສິນຄ້າຖິ່ນກຳເນີດ ຢູ່ແຂວງເຊກອງ

ເພື່ອສືບຕໍ່ສ້າງຄວາມເຂົ້າໃຈ ແລະ ກະກຽມການຈົດທະບຽນຖິ່ນກຳເນີດ ໂດຍສະເພາະ ໂສມ ຢູ່ເມືອງດາກຈຶງ ແຂວງເຊກອງ, ກົມຊັບສິນທາງປັນຍາ (ກຊປ) ໄດ້ຈັດກອງປະຊຸມ ເຜີຍແຜ່ ກ່ຽວກັບການນຳໃຊ້ຊັບສິນທາງປັນຍາ ເຂົ້າໃນຂະບວນການຜະລິດໂສມ ເມືອງດາກຈຶງ ເພື່ອກະກຽມຈົດທະບຽນຖິ່ນກຳເນີດຂຶ້ນ ໃນວັນທີ 10 ກັນຍາ 2021, ທີ່ເມືອງລະມາມ, ແຂວງເຊກອງ, ໂດຍການໃຫ້ກຽດການເປັນປະທານຂອງ ທ່ານ ເຫຼັກໄຫຼ ສີວິໄລ, ເລຂາຄະນະບໍລິຫານງານພັກແຂວງ, ເຈົ້າແຂວງໆເຊກອງ ແລະ ຂະແໜງການກ່ຽວຂ້ອງເຂົ້າຮ່ວມລວມ 50 ຄົນ.

ຈຸດປະສົງຂອງກອງປະຊຸມຄັ້ງນິ້ີ້ ເປັນການເປີດກວ້າງໃຫ້ບັນດາຜູ້ປະກອບການ ໄດ້ມີຄວາມເຂົ້າໃຈຫຼາຍຂຶ້ນກ່ຽວກັບວຽກງານຖິ່ນກໍາເນີດ ທັງເປັນບາດກ້າວເລີ່ມຕົ້ນໃນການກະກຽມຄວາມພ້ອມ ໃຫ້ແກ່ການຈົດທະບຽນຖິ່ນກຳເນີດ ໂສມເມືອງດັກຈຶງ ແຂວງເຊກອງ ແລະ ຍັງຈະເປັນເວທີ່ອັນສຳຄັນ ໃນການຄົ້ນຄວ້າ ແລະ ແລກປ່ຽນ ບົດຮຽນ-ປະສົບການ ກ່ຽວກັບ ວຽກງານ ຖິ່ນກໍາເນີດ ທີ່ມີການຈັດຕັ້ງປະຕິບັດມາແລ້ວໃນ ສປປ ລາວ.

ທ່ານ ປອ. ນາງ ຂັນລາສີ ແກ້ວບຸນພັນ, ຫົວໜ້າກົມຊັບສິນທາງປັນຍາ ອຄ, ໃຫ້ຮູ້ຕື່ມວ່າ: “ສປປ ລາວ ເຮົາ ມີສິນຄ້າທ່າແຮງບົ່ມຊ້ອນຢ່າງຫຼວງຫຼາຍ ທີ່ເປັນພູມປັນຍາທ້ອງຖິ່ນແບບດັ້ງເດີມ ທີ່ຈະສາມາດ ນໍາໃຊ້ລະບົບຊັບສິນທາງປັນຍາ, ໂດຍສະເພາະ ການຈົດທະບຽນປົກປ້ອງຖິ່ນກໍາເນີດ ໃຫ້ບັນດາສິນຄ້າທີ່ເປັນເອກະລັກຂອງແຕ່ລະທ້ອງຖິ່ນ ທີ່ມີຢູ່ໃນແຕ່ລະແຂວງທົ່ວປະເທດ ແນໃສ່ສ້າງມູນຄ່າເພີ່ມ ແລະ ຄວາມອາດສາມາດໃນການແຂ່ງຂັນໃຫ້ສິນຄ້າຂອງລາວ ໃນຕະຫຼາດພາກພື້ນກໍ່ຄືສາກົນ” ພ້ອມໃຫ້ໃຫ້ຮູ້ວ່າ “ການຈົດທະບຽນ ຖິ່ນກຳເນີດໂສມດາກຈຶງ ກໍແມ່ນເພື່ອປົກປ້ອງຊື່ສຽງ ແລະ ເອກະລັກສະເພາະຂອງໂສມ ທີ່ເປັນໜຶ່ງດຽວໃນໂລກ ມີປະຫວັດຄວາມເປັນມາທີ່ຍາວນານ, ມີຄວາມຕິດພັນກັບວັດທະນະທໍາ ແລະ ວິຖີການດໍາລົງຊີວິດຂອງຊາວເຊກອງ ທີ່ມີມາໄດ້ຫຼາຍສະຕະວັດແລ້ວ ເປັນການປົກປັກຮັກສາ ແລະ ປົກປ້ອງພູມປັນຍາທ້ອງຖິ່ນທີ່ເປັນມໍລະດົກທາງວັດທະນະທໍາສືບທອດຈາກບັນພະບູລຸດສູ່ຄົນລຸ້ນປະຈຸບັນ”.

ໃນກອງປະຊຸມຍັງໄດ້ ນຳສະເໜີວຽກງານທີ່ສຳຄັນທີ່ຕິດພັນກັບກະກຽມການຈົດທະບຽນຖິ່ນກຳເນີດ, ການສ້າງຕັ້ງສະມາຄົມ ແກ່ຜູ້ຜະລິດ ແລະ ຜູ້ປະກອບການ ແລະ ໄດ້ສຳເລັດການແຕ່ງຕັ້ງຄະນະຂົນຂວາຍ ສ້າງຕັ້ງສະມາຄົມ ກ່ອນການຈົດທະບຽນສິນຄ້າຖິ່ນກຳເນີດ.

ໃນກອງປະຊຸມ ຍັງໄດ້ພິທີຮັບການແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ກ່ຽວກັບໂປຣແກມການຊ່ວງເຮືອແພຂອງເມືອງດາກຈຶງ, ແຂວງເຊກອງ ທີ່ຍື່ນຕາງໜ້າເມືອງດາກ ຈຶງ ໂດຍທ່ານ ໄລສວນ ມິດສຸວັນ ເຈົ້າເມືອງ ເມືອງດາກຈຶງ ອີກດ້ວຍ.

ຕໍ່ກອງປະຊຸມດັ່ງກ່າວ ທ່ານເຈົ້າແຂວງ ໄດ້ສະແດງຄວາມຊົມເຊີຍຕໍ່ກົມ​ຊັບ​ສິນ​ທາງ​ປັນຍາ ກໍ​ຄື​ກະຊວງ​ອຸດສາຫະກໍາ ​ແລະ ການ​ຄ້າ ທີ່​ໄດ້​ໃຫ້ການ​ສະໜັບສະໜູນ, ຊ່ວຍ​ເຫຼືອ​ແຂວງ​ເຊ​ກອງ ໃຫ້ໄດ້ຮັບ​ການ​ຈົດ​ທະບຽນຖິ່ນ​ກໍາ​ເນີ​ດຂອງ​ພືດ​ພັນ​ທີ່​ເປັນ​ເອກະ​ລັກ ກໍ​ຄື​ເປັນ​ທ່າ​ແຮງ​ທາງ​ດ້ານ​ເສດ ຖະກິດ​ຂອງ​ແຂວງ ເປັນຕົ້ນ: ​ໂສມ​ເມືອງ​ດາກ​ຈຶງ, ພ້ອມທັງຢືນຢັນວ່າ “ຈະຊຸກຍູ້​ບັນດາ​ຂະ​ແໜງ ການ​ທີ່​ກ່ຽວຂ້ອງ​ເປັນຕົ້ນ: ຂະ​ແໜງອຸດສາຫະກໍາ ​ແລະ ການ​ຄ້າ, ຂະ​ແໜງກະສິກໍາ ​ແລະ ປ່າ​ໄມ້ ​ແລະ ຂະ​ແໜງການ​ອື່ນໆທີ່​ກ່ຽວຂ້ອງ ສືບຕໍ່ຈັດຕັ້ງປະຕິບັດ, ຊຸກຍູ້​ສົ່ງ​ເສີມ​ສ້າງ​ເປັນ​ກຸ່ມ​ການ​ຜະລິດ​ໃຫ້​ກາຍ​ເປັນ​ສິນຄ້າ ​ໃຫ້​ໄດ້​ຮັບ​ຜົນ​ສໍາ​ເລັດ”.

ແຫຼ່ງຂໍ້ມູນ: ກົມຊັບສິນທາງປັນຍາ

   

ສະໜັບສະໜູນໂດຍ:

ໂຄງການຮ່ວມມືລາວ – ສະຫະລັດອາເມລິກາ
ເພື່ອການເຊື່ອມໂຍງ ສາກົນ ແລະ ອາຊຽນ (USAID LUNA II)

ການສ້າງເວັບໄຊນີ້ ໄດ້ຮັບການສະໜັບສະໜູນຈາກປະຊາຊົນສະຫະລັດອາເມລິກາ ໂດຍຜ່ານອົງການພັດທະນາສາກົນສະຫະລັດອາເມລິກາ (USAID) ເຊິ່ງອົງການ USAID ຫຼື ລັດຖະບານສະຫະລັດອາເມລິກາ ຈະບໍ່ຮັບຜິດຊອບຕໍ່ຂໍ້ມູນທີ່ເອົາລົງໃນເວັບໄຊດັ່ງກ່າວ