ໃນວັນທີ 16-19 ທັນວາ 2024, ທີ່ໂຮງແຮມສຸພັດຕາ, ແຂວງ ຫຼວງພະບາງ, ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ເປັນເຈົ້າພາບຈັດກອງປະຊຸມໜ່ວຍງານຊັບສິນທາງປັນຍາອາຊຽນ (AWGIPC) ຄັ້ງທີ 74 ແລະ ອີກສາມກອງປະຊຸມທີ່ກ່ຽວຂ້ອງ, ພາຍໃຕ້ການເປັນະທານກ່າວເປີດກອງປະຊຸມຂອງ ທ່ານ ນາງ ຈັນສຸກ ແສງພະຈັນ, ຮອງລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ພ້ອມກັນນັ້ນມີທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ, ປະທານໜ່ວຍປະຕິບັດງານດ້ານຊັບສິນທາງປັນຍາອາຊຽນ, ມີບັນດາທ່ານຫົວໜ້າກົມ, ຫ້ອງການຊັບສິນທາງປັນຍາ ປະເທດສະມາຊິກອາຊຽນ, ປະເທດ ຕໍມໍເລສເຕ, ຕາງໜ້າຈາກກອງເລຂາອາຊຽນ ແລະ ຄະນະຜູ້ແທນ ທີ່ກ່ຽວຂ້ອງເຂົ້າຮ່ວມ.
ໃນໂອກາດນີ້ ທ່ານ ນາງ ຈັນສຸກ ແສງພະຈັນ, ຮອງລັດຖະມົນຕີ ກະຊວງ ອຄ ໄດ້ໃຫ້ກຽດກ່າວເປີດກອງປະຊຸມ ໃນຄັ້ງນີ້ ວ່າ: ກອງປະຊຸມໜ່ວຍປະຕິບັດງານດ້ານຊັບສິນທາງປັນຍາອາຊຽນ ຄັ້ງທີ່ 74, ທີ່ ສປປ ລາວ ເປັນປະທານຫນ່ວຍປະຕິບັດງານດ້ານຊັບສິນທາງປັນຍານີ້ ມີຈຸດປະສົງ ເພື່ອລາຍງານຜົນສໍາເລັດຂອງກອງປະຊຸມລັດຖະມົນຕີເສດ ຖະກິດອາຊຽນ ແລະ ກອງປະຊຸມເຈົ້າໜ້າທີ່ອາວຸໂສ ໃນໄລຍະຜ່ານມາ ທີ່ຕິດພັນກັບວຽກງານຊັບສິນທາງປັນຍາ ແລະ ຈະໄດ້ມີການປຶກສາຫາລື ກັບຜູ້ຕາງໜ້າຈາກອົງການຊັບສິນທາງປັນຍາໂລກ ແລະ ອົງການຊັບສິນທາງປັນຍາແຫ່ງສະຫະພາບເອີຣົບ.
ພ້ອມດຽວກັນນັ້ນ ບັນດາຜູ້ແທນທີ່ເຂົ້າຮ່ວມກອງປະຊຸມ ຈະໄດ້ມີການພົບປະກັນ, ສະແດງເຖິງຄວາມມຸ່ງໝາຍຮ່ວມກັນ ເພື່ອປຶກສາຫາລື ແລະ ຮັດແໜ້ນສາຍພົວພັນ ລະຫວ່າງ ຫ້ອງການຊັບສິນທາງປັນຍາ ຂອງບັນດາປະເທດສະມາຊິກອາຊຽນ, ຕີມໍເລດສເຕ ແລະ ຄູ່ຮ່ວມພັດທະນາທີ່ສໍາຄັນຂອງພວກເຮົາ ເຊັ່ນ: ອົງການຊັບສິນທາງປັນຍາໂລກ, ອົງການຊັບສິນທາງປັນຍາເອີຣົບ ແລະ ພາກສ່ວນອື່ນໆ ໃນການຮ່ວມມືດ້ານຊັບສິນທາງປັນຍາ ໂດຍສະເພາະ ການພັດທະນາດ້ານລະບົບການຄຸ້ມຄອງ ແລະ ປົກປ້ອງຊັບສິນທາງປັນຍາ ຂອງປະເທດສະມາຊິກອາຊຽນ ເພື່ອພັດທະນາການບໍລິການຊັບສິນທາງປັນຍາ ຂອງປະເທດສະມາຊິກອາຊຽນ ໃຫ້ມີຄວາມວ່ອງໄວ, ທັນສະໄຫມ ທຽບທັນສາກົນ ເພື່ອຊຸກຍູ້ ແລະ ສົ່ງເສີມການປະດິດສ້າງ ແລະ ປະດິດຄິດແຕ່ງ ຂອງອາຊຽນ ເຮັດໃຫ້ອາຊຽນ ເປັນພາກພື້ນທີ່ມີຄວາມກ້າວໜ້າ ແລະ ໂດດເດັ່ນ ໃນການສ້າງນະວັດຕະກຳ ແລະ ນຳໃຊ້ວຽກງານຊັບສິນທາງປັນຍາ ເປັນເຄື່ອງມື ເພື່ອເຊື່ອມໂຍງເສດຖະກິດໃນພາກພື້ນໃຫ້ມີຄວາມເຂັ້ມແຂງ, ສາມາດແຂ່ງຂັນ ກັບພາກພື້ນ ແລະ ສາກົນຕາມເປົ້າໝາຍແຜນແມ່ບົດຂອງປະຊາຄົມເສດຖະກິດອາຊຽນ.
ທ່ານ ກ່າວຕື່ມອີກ ວ່າ: ປີນີ້ ສປປ ລາວ ໄດ້ຮັບກຽດເປັນປະທານອາຊຽນ ແລະ ເປັນປະທານໜ່ວຍງານຮ່ວມມືດ້ານຊັບສິນທາງປັນຍາອາຊຽນ (AWGIPC) ຊຶ່ງມີທັງກາລະໂອກາດ ແລະ ສິ່ງທ້າທາຍ ໂດຍສະເພາະ ໃນສະພາບເສດຖະກິດທີ່ກໍາລັງພົບກັບຄວາມຫຍຸ້ງຍາກ ແລະ ສະຫຼັບຊັບຊ້ອນຂອງພາກພື້ນ ແລະ ສາກົນ ຊຶ່ງຮຽກຮ້ອງໃຫ້ພວກເຮົາ ຕ້ອງເພີ່ມທະວີຄວາມສາມັກຄີເປັນໜຶ່ງດຽວ ແລະ ຮ່ວມມືກັນຢ່າງສະໜິດແໜ້ນ ໂດຍສະເພາະ ການຮ່ວມມືກັບ ອົງການຊັບສິນທາງປັນຍາໂລກ ກ່ຽວກັບການນໍາໃຊ້ເຕັກໂນໂລຊີ ແລະ ນະວັດຕະກໍາ ເປັນຕົ້ນໃນຂົງເຂດ ດິຈິຕ໋ອນ ທີ່ກຳລັງມີບົດບາດອັນສຳຄັນ ໃນຍຸກເສດຖະກິດດິຈິຕ໋ອນ. ເພື່ອບັນລຸເປົ້າໝາຍການຮ່ວມມືດ້ານຊັບສິນທາງປັນຍາ ແລະ ສະໜັບສະໜູນການຮ່ວມມືຢ່າງຕໍ່ເນື່ອງໃນແຜນປະຕິບັດງານດ້ານຊັບສິນທາງປັນຍາອາຊຽນ 2016-2025. ປີນີ້, ເປັນປີຂອງການກະກຽມສ້າງແຜນຍຸດທະສາດ ໃນການຮ່ວມມືວຽກງານຊັບສິນທາງປັນຍາຂອງອາຊຽນ ຮອດປີ 2045.
ທ່ານ ຫວັງຢ່າງຍິງ ວ່າ: ບັນດາຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ ຈະຮ່ວມກັນເປັນເອກະພາບ ເພື່ອພັດທະນາວຽກງານຊັບສິນທາງປັນຍາ ໄປໃນທິດທາງທີ່ມີຄວາມກ້າວໜ້າເທື່ອຮ່ວມກັນ. ສະນັ້ນ, ການປຶກສາຫາລື ແລະ ແລກປ່ຽນທັດສະນະຮ່ວມກັນ ໃນການກຳນົດແນວທາງໃນການພັດທະນາລະບົບຊັບສິນທາງປັນຍາຂອງສາກົນ, ໂດຍສະເພາະ ຄວາມສຳຄັນໃນການເຊື່ອມໂຍງກັນ ລະຫວ່າງ ແຜນຍຸດທະສາດຊັບສິນທາງປັນຍາ ປິ 2045, ຕິດພັນກັບ ການເຕີບໂຕຂອງ 5 ຂະແໜງການເສດຖະກິດ ຄື: ເສດຖະກິດສີຂຽວ Green Economy, ເສດຖະກິດສີຟ້າ Blue economy, ເສດຖະກິດສ້າງສັນ Creative Economy, ເສດຖະກິດ ດີຈີຕ໋ອນ ແລະ ເສດຖະກິດວິທະຍາສາດ, ເທັກໂນໂລຊີ ແລະ ນະວັດຕະກຳ Science, Technology, and Innovation Economy ອີກດ້ວຍ.
ຂ່າວ: ກົມຊັບສິນທາງປັນຍາ
