ວັນທີ 18 ທັນວາ 2024 ທີ່ນະຄອນຫຼວງພະບາງ, ຫ້ອງການຊັບສິນທາງປັນຍາຂອງສະຫະພາບເອີຣົບ (EUIPO), ໄດ້ຮ່ວມມືກັບ ອາຊຽນ ໃນການເປັນເຈົ້າພາບຈັດກອງປະຊຸມ ຫົວຂໍ້ ກາລະໂອກາດ ແລະ ສິ່ງທ້າທາຍ ຂອງຖິ່ນກຳເນີດ (GI) ສໍາລັບບັນດາປະເທດອາຊຽນ, ໂດຍການເປັນປະທານຂອງ ທ່ານ ນ. ສີດາ ຢູຕຼີຈັນທະຈັກ ຮອງຫົວໜ້າກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ, ໃນກອງປະຊຸມຄັ້ງນີ້ ມີຜູ້ຕາງໜ້າຈາກ ຫ້ອງການຊັບສິນທາງປັນຍາຂອງສະຫະພາບເອີຣົບ, ຜູ້ຕາງໜ້າຈາກ ກົມຊັບສິນທາງປັນຍາ, ຜູ້ຕາງໜ້າຈາກບັນດາປະເທດສະມາຊິກອາຊຽນ ແລະ ພາກສ່ວນທີ່ກ່ຽວຂ້ອງກັບຖິ່ນກຳເນີດ.
ຈຸດປະສົງໃນກອງປະຊຸມຄັ້ງນີ້ ແມ່ນເພື່ອເສີມສ້າງ, ຍົກສູງ, ສ້າງຈິດສຳນຶກ ແລະ ຄວາມສາມາດດ້ານການຈົດທະບຽນ ແລະ ປົກປ້ອງຜະລິດຕະພັນຖິ່ນກໍາເນີດ ໃນທົ່ວພາກພື້ນ.
ກອງປະຊຸມຄັ້ງນີ້ ຈັດຂຶ້ນພາຍໃຕ້ກອບການເຊື່ອມໂຍງແບບຍືນຍົງ ລະຫວ່າງ ຫ້ອງການຊັບສິນທາງປັນຍາຂອງສະຫະພາບເອີຣົບ-ອາຊຽນ ໂຄງການດ້ານສິດຕໍ່ຊັບສິນທາງປັນຍາ (SCOPE IPR), ກອງປະຊຸມໄດ້ ຍົກໃຫ້ເຫັນຄວາມສຳຄັນຂອງການປົກປ້ອງຊັບສິນທາງປັນຍາ ໃນການສົ່ງເສີມບັນດາຂະແໜງການຜະລິດໃນເຂດອາຊີຕາເວັນອອກສຽງໃຕ້ ແລະ ຊ່ວຍບັນດາຜູ້ຜະລິດໃນທ້ອງຖິ່ນ ເພື່ອສ້າງ, ປົກປ້ອງ ແລະ ນຳໃຊ້ສິດຊັບສິນທາງປັນຍາເພື່ອການຄ້າ. ຕາມແຜນປະຕິບັດງານ ສິດດ້ານຊັບສິນທາງປັນຍາຂອງອາຊຽນແຕ່ປີ 2016-2025, ແມ່ນໃຫ້ບຸລິມະສິດ ກົນໄກທາງດ້ານຊັບສິນທາງປັນຍາລະດັບພາກພື້ນ ເພື່ອສົ່ງເສີມການສ້າງ ແລະ ການນຳໃຊ້ຄຸນຄ່າຂອງຊັບສິນທາງປັນຍາ ເຊັ່ນ:ຖິ່ນກຳເນີດ ເປັນຫົວຂໍ້ໃນການສຳມະນາຄັ້ງນີ້.
ໃນຖານະເປັນອົງການຈົດທະບຽນສາກົນສໍາລັບຖິ່ນກໍາເນີດ, ຫ້ອງການຊັບສິນທາງປັນຍາຂອງສະຫະພາບເອີຣົບ ມີລະບົບຖານຂໍ້ມູນທີ່ດີ ສຳຫຼັບການສົ່ງເສີມການປົກປ້ອງ ແລະ ເພີ່ມມູນຄ່າ ຂອງຖິ່ນກໍາເນີດໃນທົ່ວໂລກ. ຫວ່າງມໍ່ໆມານີ້ ຫ້ອງການຊັບສິນທາງປັນຍາຂອງສະຫະພາບເອີຣົບ ໄດ້ຖືກມອບໝາຍໃຫ້ຄຸ້ມຄອງການຈົດທະບຽນເຄື່ອງຫັດຖະກຳ ແລະ ອຸດສາຫະກຳ ແລະ ມີຫຼາຍຖິ່ນກໍາເນີດ ໃນລະດັບ ສະຫະພາບເອີຣົບ, ຊຶ່ງຈະສາມາດຍື່ນຄຳຮ້ອງໄດ້ ເລີ່ມແຕ່ວັນທີ 1 ທັນວາ 2025 ເປັນຕົ້ນໄປ.
ການຮ່ວມມືລະຫວ່າງ ຫ້ອງການຊັບສິນທາງປັນຍາຂອງສະຫະພາບເອີຣົບ ແລະ ອາຊຽນ ມີຈຸດປະສົງເພື່ອປົກປ້ອງ ແລະ ຍົກສູງສະຖານະພາບຜະລິດຕະພັນທີ່ເປັນເອກະລັກຂອງພາກພື້ນ, ຊ່ວຍໃຫ້ຜະລິດຕະພັນດັ່ງກ່າວເຕີບໃຫຍ່ໃນຕະຫຼາດສາກົນ ແລະ ສາມາດດຶງດູດຄູ່ຮ່ວມມືທາງທຸລະກິດ. ໂດຍການສະຫນັບສະຫນູນເຈົ້າຫນ້າທີ່ຊັບສິນທາງປັນຍາໃນພາກພື້ນອາຊຽນ ເພື່ອສ້າງຄວາມເຂັ້ມແຂງໃຫ້ລະບົບຖິ່ນກຳເນີດ, ຫ້ອງການຊັບສິນທາງປັນຍາຂອງສະຫະພາບເອີຣົບ ມຸ່ງໝັ້ນທີ່ຈະເຮັດໃຫ້ແນ່ໃຈວ່າ ຜະລິດຕະພັນ ເຊັ່ນ: ຜ້າໄຫມຫຼວງພະບາງ ຈະບໍ່ພຽງແຕ່ໄດ້ຮັບການປົກປ້ອງເທົ່ານັ້ນ ແຕ່ຍັງຈະໄດ້ການຮັບຮູ້ໃນທົ່ວໂລກ.
ວັນທີ 17 ທັນວາ 2024 ຜ່ານມານີ້, ຄະນະຜູ້ແທນຂອງອົງການ ຫ້ອງການຊັບສິນທາງປັນຍາຂອງສະຫະພາບເອີຣົບ ແລະ ອາຊຽນ ໄດ້ໄປຢ້ຽມຢາມຜູ້ຜະລິດຜ້າໄໝຫຼວງພະບາງ. ຜ້າໄໝຫຼວງພະບາງໄດ້ຮັບການຈົດທະບຽນເປັນ ຖິ່ນກຳເນີດ ຊຶ່ງສາມາດເຮັດໃຫ້ປົກປ້ອງເອກະລັກ ຂອງຜ້າໄໝດັ່ງກ່າວໃນອາຊີຕາເວັນອອກສຽງໃຕ້. ການຢ້ຽມຢາມຄັ້ງນີ້ໄດ້ຍົກໃຫ້ເຫັນຄວາມສຳຄັນຂອງການປົກປັກຮັກສາຄຸນຄ່າທາງວັດທະນະທຳ ແລະ ເສດຖະກິດຂອງຜະລິດຕະພັນທ້ອງຖິ່ນ, ຕະຫຼອດຮອດບົດບາດຂອງຖິ່ນກຳເນີດ ໃນການຊຸກຍູ້ການພັດທະນາແບບຍືນຍົງ ແລະ ການຮັບຮູ້ຂອງສາກົນ.
ຂ່າວ: ກົມຊັບສິນທາງປັນຍາ
